“Nos ta bringando pa nos derechonan, nos ta wordo discrimina mirando cu nos ta unico Polis den Antiyas cu ta corta den nan salario, y pa colmo ta ‘tot nadere orde’, esey sigur nos no ta accepta y ta exigi claridad,” segun presidente di SPA, Joselito Dirks
Awe sindicato di Polis tabata tin un reunion di caracter extraordinario pa motibo riba e disgusto cu tin recientemente cu ta wordo corta den salario di Polis, y den cuadro di loke a Sali recientemente di sindicato SIWA caminda a trece afo cu tin 19 compania estatal cu no ta contribuyendo cu FASE.
Esaki ta mustra duidelijk cu gobierno no ta transparente cu nan segun e sindicato SPA a trece dilanti, y nan kier claridad riba esaki. Miembronan a exigi dus pa un reunion urgente tuma lugar awe anto sindicato di Polis a tuma algun decision. E sindicato tin contacto constante cu sindicatonan di Polis di Antiyas, ta intercambia idea tambe cu nan. Sindicato di Corsou a informa cu pa locual ta sindicato di Antiyas completo, ni un florin a wordo kita for di nan salario, al contrario nan ta hayando un calamiteidstoelage di 75 florin pa dia.
Cu otro palabra, nan ta cobra salario completo, nan ta cobra calamiteidstoelage, y nan ta cobra nan overtime. E pregunta a bin e ora pa kico tin excepcion pa Polis di Aruba, si tur ta cay bao mesun Reino, bao di mesun Landspakket.
Durante reunion di awe, bini dos mocion: miembronan ta exigi pa sindicato di Polis traha un carta y manda pa Knops na Hulanda, pa exigi contesta riba pa kico mester corta salario di polis di Aruba, mientras cu full Antiyas no a experiencia esaki si ta papia di mesun Landspakket. E di dos mocion cu a bini ta pa traha un carta pa Minister di Husticia pa exigi informacion riba ki tempo e calamiteidstoelage ta bay wordo paga, pasobra for di basta luna caba esaki lo bini pero no a pasa ainda. Den e carta, miembronan ta exigi pa bin un ultimatum te dia 10 december, si pa e dia aki no tin contesta di gobierno, den temporada di fiesta aki Polisnan lo bay ‘walk out’ segun sindicato SPA.