TEL AVIV, Israel- “Bon Dia” ta loke e homber a skirbi ariba su pagina di Facebook. Esaki tabata suficiento motibo pa polis a detene. Motibo? Pasobra pa polis e tabata un menasa di atentado.
E homber a share un potret caminda cu e ta pose banda di un bulldozer. El a desea su siguidonan un bon dia. E mensahe ey a hala atencion, ya cu bulldozer a yega di wordo uza anteriormente den atentadonan.
Polis a drenta den accion di biaha, ya cu e frase a wordo traduci automaticamente door di Facebook. E traduccion a haci di “bon dia” den Arabe, pa “haci nan daño” na Ingles y “ataka nan” den Hebreu. Segun e corant Haaretz e mensahe no a wordo mustra na un agente cu ta papia Arabe.
Despues di interogacion, polisnan a ripara e fout y a laga e homber den libertad despues di algun hora, segun un vocero di polis a informa.
E Palestino mes no tabata kier a duna comentario ariba e sucedido aki y a delete su mensahe for di ariba su pagina di Facebook.
Fuente: https://www.haaretz.com