DALLAS, Texas – Un distrito di scol di Dallas, ta wordo acusa di uza forsa extremo pa wanta un mucha homber di 7 aña cu necesidadnan special, siman pasa.
Yosio Lopez a wordo geboei, a uza un taser riba dje y a haya golpi door di Dallas Independent School District Police (DISD), despues cu e mucha homber a cuminsa dal su cbes contra un muraya den e klas, segun e abogado di famia Lopez, David Ramirez a conta CNN.
Yosio ta un studiante cu tin necesidadnan special, cu ta sufri di deficit di atencion/desorden di hiperactividad y varios otro desorden mas. El a experencia brotenan similar den pasado, pero semper tabata tin un asistent na scol cu tabata yuda pa asina calm’e.
Pero diahuebs ultimo, e asistent no tabata tey y Yosio no tabata su “luga sigur”, Ramirez a bisa. E mucha homber a conta su mama, April Odis, cu el a wordo poni riba un lessenaar cu su mannan geboei tras di su lomba, mientras cu e cabesante di scol a pone su elleboog riba su nek y a chok’e pa asina por a contene, e abogado di famia a bisa.
Despues di e incidente na e scol, Dallas ISD Police a transporta Yosio na un facilidad di salud mental, sin e permiso di su mama y a intern’e pa casi un siman. Su mama no tabata por a bishite durante e prome dos dianan, Ramirez a bisa.
Yosio tabata bao di sedante pisa durante su estadia na Dallas Behavioral Hospital y a wordo restringi pa mira su mama, bao di e referencia cu e tabata “un peliger p’e mes y pa esnan rond di dje,” di acuerdo cu Ramirez. E mucha a sali dialuna anochi y ta na su cas recuperando cu su mama.
Fuente: www.cnn.com