Den cuadro di un investigacion andando, awe diasabra merdia Recherchenan di Oranjestad a detene e homber di inicial R.O.C. di 49 aña di edad. Ta sospecha e homber aki di a comete varios crimen, manera ta “Valsheid in geschrifte”, “oplichting” y “Mensenhandel”.
Di acuerdo cu e prome impresion di e ekipo di investigadonan, e sospechoso a habri un compania y a tuma algun hende na trabou. Den e proceso e no a cumpli ni cu nan salarionan ni cu otro impuestonan y debernan di dunado di trabou pa cu e empleado na primanan social, etc. Di eynan a cuminsa investiga e formula di negoshi y ta masha lihe a bin saca afo cu e compania ta duna conseho y ta tramita permisonan di estadia, di trabou y hasta ta tramita peticion pa tereno.
Kehonan a drenta na Polis di clientenan cu a perde auto, perde hopi placa cu a paga na e homber aki sin cu nunca a regla nan permiso of tereno pa nan. Es mas, tin sospecho cu esunnan cu supuestamente el a regla lo por ta falso tambe.
Despues di su prome interogacion awe, Recherchenan a present’e dilanti Fiscal Auxiliar cu a ordena su encarcelacion pa un maximo di 2 dia. Si no keda cla den e tempo ey, lo pidi pa prolongacion di 8 dia mas.
Ultimamente Polis ta hayando bastante keho di stranheronan cu a sali perhudica di individuonan of companianan cu ta regla permiso pa estadia of trabou, ta cobra adelanta pa nan trabou y despues no ta cumpli. Como cu e personanan aki no tin permiso di residencia, hopi biaha ta opta pa keda keto y evita problema cu husticia pa no stroba e proceso di nan permiso di estadia of trabou. Pero, awor ta ripara cu hopi di e tramitadonan aki ta abusa di e posicion di poder pa comete estafa riba nan clientenan.
E investigacion lo continua den e dianan cu ta sigui. For di e ekipo di recherche a compronde cu e caso aki ta grandi y ta encera varios interogacion, revisa documentonan, pruebanan y formulanan cu ta uza pa purba burla di departamentonan oficial di Gobierno.