FRANKFURT, Alemania – Fiscalia Aleman a informa cu e ciudadano Tunecino deteni marduga den un operativo antiterorista ta wordo reclama pa Tunicia door di su presunto participacion den e atentado di Estado Islamico na 2015 contra e museo di El Bardo, cu 22 victima mortal.
E sospechoso, deteni na Frankfurt, west di Alemania, ta wordo reclama pa Tunicia tambe den relacion cu un atake cometi na principio di Maart di 2016 den e ciudad fronteriso Tunecino di Ben Guerdan.
Den e operativo, realisa den e estado federado di Hesse, a wordo deteni un total di 16 persona entre 16 y 46, cu lo wordo interoga a lo largo di e dia.
Segun e datonan disponibel te na e momento, e principal sospechoso, di 36 aña, a biba na Alemania entre 2003 y April di 2013 y el a bin bek despues na e pais aki como solicitante di asilo na Augustus 2015, fiscal di Frankfort, Alexander Badle, a señala den un comunicado.
Dia 15 di Augustus di e mesun luna, a wordo deteni na Frankfurt pa un pena pendiente di 43 dia di prizon den cumplimento di un condena di 2008 pa lesionnan.
Una bes cumpli, el a permanece e maximo premira di 40 dia den e regimen di detencion previo na su expulsion, plazo caminda cu autoridadnan Tunecino mester a presenta e documentacion pertinente pa su extradicion.
Den un rueda di prensa, e fiscal di Frankfort a agrega cu den e operativo antiterorista, caminda cu a participa mas di 1100 agente, a registra den varios ciudad di Hesse un total di 54 vivienda y local, entre nan dos meskita.
Mayoria di registro, 33 en total, a tuma luga den Frankfort, el a bisa.
Badle a subraya cu e plannan pa un atake terorista ainda tabata den un fase preliminar y no tabata existi tampoco un obhetivo concreto, door cu no tabata tin un menasa inminente di atentado.
“Nos a blokia e canal aki, nos a saca e personanan aki di circulacion,” el a señala al respecto.
Fuente: RCN Nieuws