Diasabra atardi polis ta keda informa cu lo mester tin un chauffeur poco cansa a dal cu su auto den acera y no por move mas net na altura di Weng Kee Supermarket na Piedra Plat. Un patruya di polis ta bay na e sitio y ta topa cu un Nissan Sentra shinishi mita riba caminda y cu e wiel banda robes dilanti kibra.
E auto lo mester a bin di direccion nort bayendo zuid net prome cu e t-weg e ta baha caminda na su man robes dal den e acera y sigui core pa bay subi e caminda y den e intento e wiel lo a kibra cu e auto no por a move mas. Polis a papia cu e chauffeur y a constata cu e chauffeur ta bou di influencia y a detene y hibe warda pa sosega curpa. Takelwagen a bin kita e auto for di riba caminda debi cu e tabata stroba trafico.