Champ of the Champs 2017 den su di 11 edicion dedica na Bibiano Croes a continua diamars riba veld di Dragon Hitters na Barcadera. Policia de Panama kendenan a yega Aruba desde diadomingo a bin cu un tremendo ekipo e aña aki cu intensionnan serio. Policia de Panama ta pica ariba 3-0 den prome inning contra Crush Power riba batasonan solido. Despues e pitcher Ediomar Rodriguez di Crush Power ta settle riba monticulo pero ta perde e wega finalmente 4-2. E pitcher Maximo Puertes di Policia di Panama a luci hopi fuerte riba monticulo y ta seya e victoria riba su nomber. Policia de Panama 4 careda, 7 hit, 1 eror. Crush Power 2 careda, 6 hit, 1 eror. Miho bateadornan pa Policia de Panama ta Victor Vazquez 2-1, David Gutierrez 3-2 y Cesar Cassas 1-1. Pa Crush Power a destaca na plato Randy Paredes 3-2. Den e di dos wega di anochi Royal Power Tat Fat Home Depot ta topa e fuerte ekipo Balashi Premium. Royal Power ta pica ariba 4-0 pero Balashi ta menasa y ta haci e wega 4-3. Balashi den tercer inning ta yena base sin out pero Manager ta cambia Jomark Flanegin y ta trece Eudomar Toyo kende ta poncha tercer cuarto y kinto bate den fila pa cera e inning. Royal Power ta rally pa finalmente gana nan di dos wega den Champ of the Champs. Royal Power Tat Fat 9 careda, 10 hit, 2 eror. Balashi Premium 3 careda, 5 hit, 3 eror. Jomark Flanegin ta gana e partido mientras Antonio Warner ta bay cas cu e derota. Pa Royal Power Tat Fat Jair Thompson a bay di 2-2, Kelvin Silvania y Joshua Ramada ambos di 1-1. Pa Balashi Jeromy Kelly a bay di 3-2 y Giomar Alders di 1-1. Champ of the Champs ta continua tur dia te cu diadomingo 2 di Juli riba veld di Dragon Hitters cerando cu fully loaded “Tsunami”. Softball Internacional a la mil maravilla.