Polemica na Merca: Debate riba e suspension permanente di Donald Trump su Twitter ta crece

Internacional: Medionan social ta explotando na fabor y contra di e suspension permanente di Presidente Donald Trump su cuenta di Twitter. Pero e debate no ta limita na e usuarionan di e medionan social so, sino cu ta transcende tambe na e comunidad politico y academico.

E medio social a indica cu a tuma e decision “debi na e risico di incitacion nobo na violencia”. Inmediatamente, democratanan di perfil halto a uni nan mes na e celebracion di hopi otronan riba medionan social, unda cu a impone como tendencia e dicho lmao Trump (un forma popular di haci chercha di loke a pasa). Pero kizas loke ta mas curioso, ta cu na momento cu tabata anunciando e decision di Twitter, Senador Republicano pa Texas, Ted Cruz, un di e dos Senadornan cu mas a apoya e siman aki e intento di desacredita e resultadonan electoral di Presidente Trump, tabata den aire cu Cadena ABC y a condena Trump duramente. “Nunca mi a apoya e retorica di Presidente Donald Trump, hamas den e cuater añanan aki”, Cruz a afirma dilanti e mirada sorprendente di e presentadornan di television.

Pa e analista politico Democrata y ex vocero di Harry Reid -tempo cu e tabata Presidente di e mayoria den senado-, Jose Dante Parra, Twitter a tarda den tuma e decision aki.
“Un cuenta di Twitter di e tamaño di esun di Presidente Trump (cu tabata conta cu 88 miyon di seguidor) ta un arma di destruccion masiva mal uza. Esaki ta un homber peligroso cu un cuenta asina den su man”, Parra a duna di conoce. Tambe, e experto den comunicacion democrata ta di acuerdo cu Twitter cu e palabranan di Presidente Trump por generar situacionnan violento.

No solamente Presidente Donald Trump ta creando precedente cu su negacion pa acepta cu el a perde eleccion, pero awor tambe ta menasa di no haci acto di presencia na e acto di investidura di Joe Biden como Presidente nobo di Merca. Si Trump cumpli cu su ultimo declarionnan, e lo bira e di 7 Presidente den historia di Merca cu no ta presenta na e ceremonia di hurametacion y posecion di su sucesor.

 

Comments

comments