Nos Tata di Cultura di Aruba, Señor, Juan Chabaya Lampe, miho conoci como “Padu del Caribe…” Un Ser Espiritual, personahe excepcional y Nos Orguyo Nacional. “Padu, eternamente graba den nos alma y curason…!’ Padu, Un ser maraviyoso cu a refleha e ternura den su wowonan, el a mustra nos e bunitesa di su alma y su interior, cu su mannan creativo, el a pinta nos un panorama cu color y poesia, pas, emosion y harmonia, bida, briyo y amor. Cu cada dede el a crea un melodia, un sinfonia di alegria cu notanan di ritmo, energia, magia, goso y pasion cu su versonan el a trece pa Aruba e frescura pa nos alma, cu sintimento berdadero di bida y ilusion. Padu, un yiu di tera humilde y creativo, honesto y positivo, un hende sensitivo cu a opone na miedo, odio y dolor, el a skirbi den nos dushi Papiamento, palabranan cu profundo sintimento, saca cu speransa for di su alma y curason. Cu cada verso el a brinda nos tur su confiansa cu notanan y cantonan memorabel, fruta di e fuente di su inspiracion, den cada encuentro un sonrisa y cu cada despedida un Dios bendiciona bo, nos miho recuerdo di su bos y oracion.
Padu, Homber fiel y sensitivo c’un mente creativo, alegre y positivo, cu a brinda na nos Aruba tur su encanto y calor, c’un pensamento sin frontera y un curason liber di barera, a entrega su sabiduria cu a ser guia p’e mannan di Dios. Den cada obra bo por mira, un mundo di alegria, fantasia y poesia, homenahe na nos isla, na nos bida y na amor, a brota di e profundo di su alma, letranan carga cu confiansa pa elogia nos pueblo, nos cultura, tradicion y nos folklore. Padu, Un criatura fascinante, magico y impresionante cu a carga responsabel e titulo di Tata cu respet y cu tur honor, rond di mundo conoci pa su obra y su talento, el a crusa tur frontera, pa mustra eyfo cu nos na Aruba tambe por. E tabata un bon Arubiano, e orguyo di nos pueblo, e ta un nobel cabayero, mane Padu cu no tin comparacion, cu nos ritmonan crioyo, tumba, wals, danza y calypso, nos por sinti e privilegio cu nos cultura a haya su balor. Cu’n spirito bondadoso, homber fiel y generoso, a yena nos Aruba cu mas di un riu di encanto y emocion, el a canta pa Aruba cu notanan di frescura pa expresa su sintimento y amor berdadero cu tur e forsa di su bos.
Den cada melodia bo por sinti su energia, tur nota di luz y harmonia, baña cu perfume y aroma di amor, cu e curason di un mucha, e energia di un hoben y cu e sabiduria di un hende grandi, el a regala nos su creacion. Cu e alma di guerero, el a bringa contra tempo, turbulencia y tormento, pa brinda nos Aruba un homenahe na amor, un baluarte, compositor, mistico incomparabel, embahador, Tata di nos Cultura, mane Padu del Caribe no por tin dos. Escritor, autor y cantante, pintor, poeta y musico inigualabel, e miho aliado, consehero di paz y reconciliacion, nos tata stima, nos orguyo nacional, poeta inspira, compositor magistral, escritor maestral, digno di tur admiracion. Bo lo keda den nos mente, semper bibo y presente, como un di e regalo di mas grandi cu nos a haya di Señor, semper bibo den recuerdo y feliz den nos memoria, cada bes cu nos canta nos Himno, bo lo tey presente cerca nos.
Awe tur agradecido, pa e rikesa cu bo a laga nos, pero cu sintimentonan di tristesa, yegando e ora pa bisa bo ayo, nos Tata di cultura, danki pa tanto privilegio, tuma henter nos poesia pa nos dispidi bo, drumi dushi den brasa di Señor. Cu henter nos alma, cu henter nos bida, ta asina nos ta stima bo y ta bo so, nos ta stima, bao di tur circunstancia y te na nos morto, nos lo sigui stima bo, A bo so, A bo so…! Cu Dios bendiciona bo ricamente….! Autor: Jhon Freddy T. Montoya. 28 November 2019. Poema declama pa: Natusha Croes y Darwin Winklaar, Specialmente traha pa Bo Guia, e Cas di Tur Artista. Manera tabata custumber di tur aña, riba dia di su cumpleaño; un cantidad di artista, famia, musico, amigonan, mucha, hoben, hende grandi, bisiñanan, hendenan di tur parti di mundo, tabata desfila pa demostra na Padu, nos cariño y amistad, pa celebra bida huntu cune, pa balora su existencia, su bida, su obra y su legado cu ta uno asina impresionante y escepcional.
Nos a bini hunto pa canta cune cancionnan inmortal, pa ranca for di su cara un sonrisa sincero, pa expresa nos gratitud, pensamento y humilde sintimento pa tur loke el a laga pa nos atras. Solamente ta keda den nos curason, momentonan memorabel cu ta keda graba pa eternidad, manera ta su obra y e herencia cu nos tur a hereda di un persona asina balora. Respet pa nos Tata stima, Pilar di nos cultura, gratitud pa un legendario ilumina, un ser maraviyoso, humilde, artista inspira, mistico, visionario, icono Arubano, fugura emblematico, personahe impresionante, radiante, sensitivo, elegante, poderoso, positibo; gran artista di tur taya y fama, local y internacional. Nos cu a celebra su bida, por keda trankil di por a brinde den bida su tributo, su honor, balor y reconocemento di un trayectoria asina impresionate cu awe nos ta recorda y cu nos ta hopi agradecido pa cu esey y su bondad. Condolencia na famia completo, na su Yiu Vivian ehempel di un berdadero yiu di tera y su yiunan, nietonan di Padu, Na Victor y famia, representantena di gobierno, Pueblo di Aruba, Caribe y Hulanda y Latinoamerica, tur artista, bisiña cu cada aña tabata bishite na su cas pa entrega na Padu un sonrisa y exprese tur admiracion di curason. Cada aña nos a logra trece pa Padu di regalo un sonrisa, un makuto cu alegria, nos poesia, nos admiracion, un rosa y e sonrisa di hopi artista cu curasonnan contento cu a presenta pa brinde tur amor cu un simpel sonrisa y presencia di hopi hende contento cu por a trece como regalo, nos Amistad puro, sincero y real cu ta keda uno eterno y inmortal. Tur aña, manera tabata custumber, un batayon di artista tabata bishita Padu na su cas cu e miho deseonan y den mi caso, e bishita di e clown (manera e tabata conoce mi) cu no por a keda atras. Tur respet pa su persona, un homenahe awe na su memoria. Danki na Padu pa tur cos cu el a duna nos. Nos ta stimabo fuerte y eternamente pa tur eternidad. Semper nos a percura pa regala Padu tur e alegria y e felicidad di mundo, cu e so, manera tur otro baluarte tabata merece…! Jhon Freddy T. Montoya, Departamento di Cultura Aruba.