New York, MERCA- Diabierna ultimo, Departamento di Husticia a publica un lista di e nombernan di mas di 40 fiscal, cu a wordo designa pa gobierno di ex- presidente Barack Obama, na cual tabata pidi nan renuncia.
Bharara tabata aparece ariba e lista, aunke cu na November ultimo, despues di a reuni cu Trump na New York, el a bisa e reporteronan cu e mandatario electo de tempo ey, a pidi pa e keda cu su cargo, pa cual el a acepta.
Pero, diasabra ultimo Bharara a anuncia pa medio di su cuenta di Twitter : “Mi no a entrega mi renuncia. Un rato pasa mi a wordo kita for di trabao”.
E anuncio di su salida di e cargo a genera sorpresa, mas aun pasobra Bharara ainda tabata mantene un careda di perfil halto, ganando un caso pa uzo di informacion privilegia pa 1.8 miyon dollar (e mas grandi den historia di Merca) y cu a persigui legisladonan, tanto Republicano como Democratanan.
Hecho ta, cu entre su investigacionnan actual, tabata tin un caso tocante recaudacion di fondo contra di e alcalde di New York, Bill de Blasio, como tambe un caso di acoso sexual contra di e cadena di noticia, Fox, cual ta un faborito di Trump.
Cada presidente sa duna ordo na e fiscalnan designa durante e administracion anterior, pa nan entrega nan renuncia, pero e decision di reemplasa tanto di un solo biaha, a bin di sorpresa.
Diasabra ultimo, e fiscal general di New York, Eric Schneiderman a bisa den un comunicado: “E decision inespera y inexplicabel di Presidente Trump di remove mas di 40 fiscal Mericano for di nan cargo un biaha mas ta genera caos den e gobierno di Trump.
E corant The Washington Post, a cita dos persona cercano di Trump, a sigura cu e consehero di presidente Trump Stephen Bannon y e fiscal general Jeff Sessions tabata kier a haci un limpiesa den e fiscalianan federal pa asina reafirma e poder di e administracion.
Ainda Trump no a presenta su candidatonan pa e 93 fiscalnan di districto di e nacion, incluso ora cu e Departamento di Husticia a pidi pa e 46 nan cu ainda no a entrega nan renuncia, pa nan haci esaki.