Ayera e grupo End Child Abuse #TaBasta a bini dilanti cu un conferencia di prensa hopi informativo relaciona cu diferente factor y puntonan importante, a base tambe di nan mesun investigacionnan tocante abuso sexual di mucha, expresando tambe malcontento cu instancianan concerni y nan procesonan pa trata cu e tematica aki riba nos isla cu mas palabra y videonan bunita cu tin accion.
Poniendo tur articulo cu a wordo reporta den media hunto, e grupo a nota cu desde caso Speeltuin unda cruelmente bida inocente di dos mucha a wordo tuma for di nan, te cu November 2018 ora Sociaal Crisisplan a wordo introduci, tin un total di 6 caso individual cu a nota reporta den media. Den un periodo di 12 luna, e ta sali afo na 0.5 caso individual reporta den media. E grupo ta subraya cu e di dos periodo di December 2018, ora Sociaal Crisisplan a cuminsa draai, te cu Juni 2020, a tuma nota di 23 caso individual raporta den media.
Esaki ta un aumento di 1.2 caso individual raporta den media pa luna. Den e ultimo periodo di 3 di Juli 2020, dia di e gran manifestacion te cu 14 november, 2020, a tuma nota di 8 caso individual raporta den media, atrobe un aumento pa un total di 1.6 caso individual raporta den media. Esaki ta mustra cu poco poco e cultura di silencio ta biniendo na su fin. E grupo ta enfatisa cu ta importante pa nota cu e cifranan aki no ta refleha e epidemia di abuso cu ta sosode diariamente riba nos isla.
Caso di abuso a subi desde comienso di ‘lockdown’
Durante e grupo aki su investigacion, a bin encontra dos articulo di 2019 cu data transparente. Durante prome cuater lunanan di 2019, 19 caso di abuso sexual di menor di edad a wordo raporta na JZP. E mesun temporada aki, fuente di hospital a informa cu nan ta ricibi 7 caso di abuso sexual y fisico di mucha pa siman, cual ta 1 mucha abusa pa dia, cu nos sa di dje. “Cuanto mas no ta wordo raporta?”, segun Mijenou Tromp di Grupo End Child Abuse #TaBasta ta expresa durante rueda di prensa ayera. E ta sigui bisa cu ademas di esaki, a wordo reporta cu caso di abuso a subi desde comienso di ‘lockdown’ den cuadro cu Covid19.
Nan a presenta cu un mama ayera cu lamentablemente a wordo forsa pa un pedofil pa cana su caminda pa husticia y a conta detayadamente con e sistema a laga e y su yiunan na caya, di cual Masnoticia lo publica articulo riba e storia aki den e dianan venidero.
E grupo ta bisa cu cuanto caso mas mester bini dilanti pa e mandatarionan por habri nan wowo y tuma accion. “Si nos wak bon durante Covid, cuanto landsbesluit a wordo traha pa Covid? Pa baha un minister cu tabata papia di corupcion, nan a pasa un mocion, gobernantenan y parlamentarionan a busca tur manera pa baha e minister aki den cierto formanan ilegal”, segun sr. Dany Marquez di e grupo a expresa. Dicon no ta busca buraco den leynan di abuso di mucha pa cambia esakinan debidamente mescos ta haci cu tur otro asunto politico ta algo cu e grupo ta cuestiona y no por compronde.
“Ki dia boso ta bay cuminsa actua?”, e grupo ta enfatisa.