Gobierno ta sigui vigila e situacion di e beachnan na Aruba despues cu horcan Matthew a pasa panort di Aruba algun siman atras. Tanto prome como despues di e mal tempo Prome Minister Mike Eman hunto cu su colega di Infrastructura sr. Benny Sevinger a bishita areanan vulnerabel of areanan afecta, manera e beachnan.
Den cuadro di e efecto cu Aruba a sufri, Gobierno a tuma e decision pa pone ploegnan di limpiesa disponibel pa haci e costanan di Aruba limpi.
E ariba menciona ta nifica cu a pone ploegnan di tanto DOW como SERLIMAR traha exclusivamente riba costanan di Aruba pa restaura e areanan aki y ta papia aki di tanto e beachnan como e camindanan pa yega e beachnan panort di Aruba. Mayoria di e ekipo cu ta wordo uza den e limpiesa aki ta e mannan, pa loke ta e ploegnan di SERLIMAR, mientras cu DOW cu a bin ta trahando riba e careteranan ta haciendo uzo di ekiponan pisa manera dumptruck, cu ta trece e greis necesario pa drecha e camindanan di santo y cu chubato ta plama e santo of hala piedranan grandi di e camindanan cu a wordo destrui.
Den combersacion cu empleadonan di SERLIMAR, nan a expresa di sa e importancia pa tin un Aruba limpi, pa cual nan ta haci nan maximo esfuerso pa e trabou di limpiesa por wordo haci den un forma mas rapido, ya cu tin diferente boca tin beachnan cu ta wordo uza tanto door di localnan como turistanan. “Nos kier pa e beachnan keda bunita manera nan ta custumbra di mira nan,” varios di nan a expresa. Tanto Prome Minister Mike Eman como Minister Benny Sevinger a priminti di lo percura pa e teamnan encarga cu e limpiesa tuma luga di tal forma cu tur hende por sigui haci uzo e famoso beachnan di Aruba lihe. Y inclusive a papia cu pa e area di hotel, ta haciendo un estudio riba e posibel solucion pa evita cu pasada di mal tempo e beachnan ta wordo destrui manera a sosode aworaki principalmente den area di e hotelnan chikito.
Henter e operacion di limpiesa aki tin un duracion di por lo menos dos siman, for di banda di Natural Bridge pa yega te na e area patras di Westpunt, ya cu e beachnan banda di hotelnan a wordo haci limpi caba.