Diadomingo atardi e play-off 2016/2017 di division dama di Arubaanse Voetbal Bond a inicia, unda cu e 4 team cu lo enfrenta otro ta Britannia, RCA, La Fama y Estudiantes. E campeon di campeonato 2015/2016 tabata Britannia, kende un biaha mas a yega e play-off y ta buscando pa yega final pa defende nan titulo, mientras cu RCA tabata e sub campeon. A dedica e campeonato 2016/2017 di dama na Grecia Peña-Koolman y Rafaela Kelly, kendenan tambe a hunga futbol y a yuda e deporte.
E campeonato a inicia cu 10 team, kendenan a bataya fuerte contra otro pa asina por a yega e play-off. E teamnan cu tabata competi contra otro ta Undesa, Estrella, Santa Fe, RCS, Dakota, Arsenal, La Fama, Estudiantes, RCA y Britannia. E prome wega entre e campeon y sub campeon di e campeonato anterior, Britannia a bay cu e victoria riba RCA di 5-3. Diadomingo atardi prome cu e wega a inicia entre La Fama y Estudiantes, Grecia Peña-Koolman y Palmira Kock-Solognier a saca e prome bala.
Den e prome minuutnan di wega La Fama a domina e wega y a bay ariba na 9 minuut di wega cu gol di Y. Huntigton. Wega a continua fuerte unda cu Estudiantes no a rindi y na 14 minuut L. Kelly a tabla e wega pero di biaha nan ta bay ariba cu gol di A. Douglas na 15 minuut di wega, unda cu Estudiantes tabatin dominio di e wega. E hungado di La Fama R. de Leon a haya carchi geel na 26 minuut di wega, mientras cu Y. Huntington a haya carchi geel na 34 di minuut.
Den e di 2 tempo L. Kelly a haya oportunidad un biaha mas pa anota e di 3 gol na 64 minuut. La Fama no ta rindi y J. Saladin a anota nan di 2 gol na 69 minuut. E wega a continua y na di 73 minuut Y. Huntington di La Fama a anota su di 2 gol pa tabla e wega. Wega a continua y La Fama a bay ariba na 79 minuut. Estudiantes no ta rindi y na 88 minuut Z. Erasmus a anota e gol di empate. Faltando un par di minuut pa wega termina L. Quandus di Estudiantes a haya e ultimo carchi geel di e wega. E wega a termina empata y cu ambos team cu 1 punto.
E wega tabata igual, unda cu ambos team a bataya fuerte. Coach di Estudiantes Saskia Janssen a indica cu e team tabata ataca y te ora cu La Fama a contra ataca y anota nan prome gol. “Estudiantes a bin bek y a habri e wega pa asina por a anota mas gol. Tambe nos a haya hungadonan cu a lesiona, unda cu a haci cambio y esaki a pone cu nos a cay un tiki atras pero nos a bin bek. La Fama a mira esey y a probecha di e cambionan ey”, coach a remarca. Awo nan lo evalua y drecha erornan pa asina nan bin mas duro pa nan siguiente weganan.
Pa Coach di La Fama, Hareld Farro, nan a hunga un wega cu tabatin e parti bon y malo, unda cu e consistencia no tabata t’ey. “Un rato a cuminsa bon, anota gol y despues a cay. Pero den e di 2 mita a bolbe bruha, pero a bin bek y a logra empata e wega”, Hareld Farro a remarca. Den un play-off e teamnan mester a wanta e bentaha, pero La Fama no a logra esaki. Pa La Fama esaki ta un bon punto di salida y di eynan lo sigui traha. “Nos lo bay bin miho. Semper tin e nerviosismo di e prome wega di play-off y nos a pasa esey. E di dos nos lo bay bin mas trankil”, asina coach Farro a remarca.
Capitan di La Fama Lilianne Saladin a haya cu na comienso di wega nan a cuminsa bon, pero a haya un poco di bruhacion den e wega y nan a cay aden. Pero despues a sali den e di dos tempo nan a bringa pa bin bek. “Nos ta bay train duro y bin duro pa RCA. Nos a bin pa bira campeon”, Lilianne Saladin a remarca.
E di dos wega di anochi tabata entre RCA y Britannia. RCA a bay ariba den e prome minuut di wega cu gol di Ch. Brete. Wega a continua fuerte unda cu ambos team a sigui bataya pero na 33 minuut D. v/d Hoorn a anota e di 2 gol pa RCA. E mita tempo ta bay aden cu RCA ganando 2-0, pero den e di dos mita Britannia a subi tereno dicidido pa gana. Na 54 minuut di wega A. Simon a anota e prome gol pa Britannia. Britannia a bay den atake y a busca nan di 2 gol cu a cay na di 65 minuut pa M. Croes. E tension di wega tabata halto y ambos team a busca pa bay cu e victoria y na 90+1 minuut di wega F. Doornkamp a anota e gol di victoria.
E standing na e momentonan aki ta Britannia cu 3 punto y 1 wega gana, La Fama y Estudiante cu 1 punto y 1 wega tabla y RCA cu 0 punto y 1 derota.
E siguiente wega lo ta entre RCA y La Fama diabierna 26 di Mei na stadion na Dakota pa 8:00 PM, mientras cu Britannia lo enfrenta Estudiantes diasabra 27 di Mei pa 8:00 PM.