Durante un conferencia di prensa a papia riba un tema hopi importante pa e maneho di sostenibilidad cu Gobierno y pais Aruba ta hibando. A lansa un video-clip unda cu muchanan ta hunga un rol importante pa conscientisa pueblo pa no uza saconan di plastic mas, cu ta dañino pa medio ambiente.
E campaña aki ta uno cu ta wordo hiba door di Plastic Ban Team – lidera pa Parlamentario Donny Rasmijn, Juliet Carvalhal (Special Coordinator Green Agenda di Gobierno di Aruba) y Omar Harms (Beleidsadviseur Prome Minister Mike Eman).
Despues cu e ley di iniciativa, cu nan mes a traha riba dje, a wordo aproba na inicio di aña, e grupo a sigui traha hunto cu stakeholdernan pa lansa un campaña pa conscientisa e pueblo riba e ley cu ta prohibi negoshinan entrega saco di plastic na e cliente, ya cu de lo contrario nan por haya un advertencia y despues boet.
E PBBT ta trahando entre otro cu Green ‘S Cool Foundation, cu den e conferencia di prensa a wordo representa pa Elton Arends. E fundacion aki ta traha hopi riba proyectonan di sostenibilidad cu enfoke riba studiantenan. Pa cumpli cu su proyectonan, e Fundacion ta cuminsa cu benta di tasnan re-usabel, manera nan campaña ta bisa. “Nos fundacion a sali di Bureau Innovatie di Gobierno. Nos a haci hopi proyecto hunto cu studiantenan p a asina siña nan di un edad hoben caba pa ta consciente di nan medio ambiente. Nos ta haci diferente competencia den cual nan por participa y siña mas riba medio ambiente, kico ta energia alternativa y sostenibilidad,”Arends a splica. E tema di e competencia ta “Aruba 2046. Con bo ta wak Aruba aki 30 aña”.
A base di e cooperacion cu e Plastic Bag Ban Team, a traha un logo di “mi tas ta re-usabel”. Pa e tas aki, cu ta traha di un material “jute” cu ta sostenibel y no ta dañino pa medio ambiente, ta bay organisa un competencia bou di studiantenan di scolnan basico y secundario di un diseño cu mester ilustra e tema di sostenibilidad. E fondonan cu recauda ta bay bek pa e fundacion por sigui haci proyecto cu ta conscientisa e muchanan jong di Aruba riba e importancia di medio ambiente.
Den e conferencia aki Minister di Medio Ambiente a wordo representa pa Allan Howell, kende tabatin masha palabra di elogio pa e trabou di e Plastic Bag Ban Team, cu a logra dal un stap hopi grandi na bienestar di medio ambiente. E ta kere cu e lo tuma un tiki tempo pero cu e pueblo ta adapta su mes, mescos cu por adapta su mes na momento cu sea e ta bay bishita of biba den exterior.
E video-clip a wordo produci door di Hairo Oduber, kende a bisa cu ta natural cu el a coopera cu e proyecto aki, mirando cu semper e tabata consciente di medio ambiente. Pero ta durante e filmacion el a bin realisa con grandi e uso di saco di plastic ta na Aruba cu ta afecta e animalnan di Aruba y e bida marino.