CEDE Aruba ta hopi contento con e proyecto PITCH TIME ta desaroyando unda cu a prepara 15 team di hobennan hunto cu nan youth coach pa PITCH 15 proyecto na 10 compania cu ta cla pa sponser un suma di AWG 15.000 na 10 fundacion.
PITCH TIME ta un proyecto diseña pa fundacionnan non- profit den nos comunidad unda ta guia hobennan boluntario cu ta dispuesto pa traha y ehecuta un proyecto pa un fundacion. CEDE Aruba a ricibi 26 proyecto di fundacionan for di cual 15 a bay final pa asina saca 10 ganado. E concepto ta casi igual cu e famoso programa “SHARK TANK” pero den un concepto adapta pa CEDE Aruba. Durante un par di siman 140 hoben a prepara nan mes den cursonan di team building, project development, public speaking, pitch bo proyecto y self- esteem. Hobennan a haña oportunidad pa haci un pitch training cu diferente comerciantenan cu a duna di nan tempo liber pa asina guia e hobennan cu a demostra nan capacidad pa structura un proyecto pa un fundacion. Aruba por ta hopi orguyoso di e calidad di hobennan cu nos tin. Hopi di e hobennan, cu edad ta varia entre 13 pa 25 aña, tabata hopi activo durante e preparacionan pa e PITCH EVENT. Nan a demostra di curazon cu nan por ta boluntarionan cu tin e conocemento den liderazgo y cu den futuro nan por ta comerciantenan hoben cu vision positivo pa nos isla su economia.
Den e siman tras di lomba y e siman aki tambe, por mira atravez di Telearuba con preparacionnan a bay y tambe riba e facebook page di PITCH TIME Aruba.
Un proyecto cu ta duna oportunidad pa hobennan desaroya nan mes como lider, sinja traha como boluntario, cu tin amor pa bo prohimo y por yuda guia otro hobennan den nos comunidad. PITCH TIME ta yuda bo kita e miedo pa presenta bo mes dilanti publico y defende un proyecto por medio di bo speech.Mester demostra con fuerte bo ta den bo pitch y presenta tur detaye pa bo proyecto luci. CEDE a busca personanan capacita pa guia e cursonan cu ta yuda di ta mas sigur di locual ta e contenido di bo presentacion y tips con pa convence un comerciante cu bo proyecto merece su ayudo financiero.
Di otro banda comerciantenan tambe ta haña oportunidad di bay traha cu hobennan y fundacionan cu ta traha segun e vision di e compania. Companianan cu ta duna bek den comunidad por ta orguyoso di nan contribuicion. Manera WEB Aruba N.V. cu ta sponsor 3 proyecto, Aruba Marriott Resort y Marriott Care Foundation, Aruba Bank N.V., Aruba Airport Authority N.V., VNO y Aruba Tourism Authority, Taco Bell, De Palm Corporation y Aruba Investment Bank. Cada un di e companianan aki tin un of mas representante, cu ta duna di nan mes pa e fundacionnan aki. CEDE Aruba ta gradici cada un di e companianan cu a aporta den e projecto PITCH TIME. Pa fin di siman e ganadornan lo wordo presenta den 4 diferente programa na TeleAruba. Danki na tur e sponsernan, hobennan y NGO’s cu e proyecto aki a bira uno hopi comenta y exitoso den nos comunidad.