SOCHI, Rusia- E pistanan di Sochi, Rusia, cu a acoge e Weganan di Inviero di 2014, a presenta un espectaculo inusual pa e amantenan di ski: sneeuw y shelo colo oraño, cu ta parce mas di ta un paisahe Marciano cu un paisahe di seronan halto. E fenomeno por a wordo observa tambe den otro puntonan di Oost- Europa, manera Rumania of Bulgaria.
NO ta trata di un fenomeno totalmente desconoci: na 2007, rond di Omsk, Siberia, tambe e fenomeno aki a presenta, pero cu’n holo desagradabel. E causa di esaki ta e mesun di biaha pasa: un nubia di stof y tera di origen desertico, hiba na un gran haltura den e atmosfera cu na su turno a wordo lastra pa e sneeuw, cu cambia di colo. Ta e mesun proceso cu ta causa cu “yobida di sanger” cu tin ora ta tuma luga den Mediterraneo.
E sneeuw color manera cora cu a sosode na Siberia, a wordo provoca pa un tormenta cu a lanta e stof for di e pais bisiña, Kazachstan. Door cu e ta bin di un region industrial, e tabata contamina cu hero, acido, fertilisante, cual tabata e causa di e mal holo.
Den e caso aki, e origen ta menos dañino: E tormenta di stof a habri caminda a traves di Grecia te yega Rusia. Esaki tabata asina grandi cu por a wak’e den e imagennan satelital di NASA. E observatorio di Atenas a splica cu ta trata di un di e transferencia di stof di Sahara pa Grecia mas grandi di historia. E stof Africano a cubri e pais por completo, segun e servicio meteorologico di e observatorio.
Fuente: http://www.atlantida.travel