Den oranan di atardi durante un patrouille rutinario di e avion di Guarda Costa tipo Dash-8 na un distancia di 120 Noord di Aruba a detecta un boto piscado di mas o menos 8 meter largo, cu 2 persona abordo y por a mira claramente cu nan ta mandando señal di auxilio.
E centro di rescate di Guarda Costa cu base na Curaçao di biaha a notifica e fregata Hulandes Zr. MS. Groningen cu ta hasiendo operacion nan tambe pa Guarda Costa, pa a saka un Helicopter di biaha pa bai buska e 2 persona nan aki.
Tambe a tuma contacto cu un boto di bela “TIARA” cu ta tawata den serkania pa keda pendiente pa si acaso mester duna asistencia na e 2 naufrago nan.
Pa 17:10 Guarda Costa di Aruba a hanja notificacion cu nan lo ta bin cu e 2 nafrago nan Aruba. Guarda Costa na Aruba a tuma contacto cu Directie Luchtvaart, Insam y Imigracion pa sina por spera jegada di e helicopter. Pa 18:15 e helicopter a baha na Aruba y e 2 naufrago nan a wordo pasa na Ambulance y Imigracion. Mester bisa cu nan tawata tin hopi awa abordo dus nan ta stabiel pero si hopi kima di solo y cansa.
Mester remarca e boto aki tawata tin solamente un compas abordo y ningun otro tipo di ekipo di seguridad pa hala atencion di otro boto cu lo por juda den e caso aki.
Guarda Costa tin un aviso di dia 7 di Juli cu un boto a Sali di Fort de France Sint Lucia y bai pisca cu 2 persona y no a bolbe mas, tur cos ta cuadra cu ta e 2 persona nan aki . Dus a notifia St Lucia cu e 2 piscador nan aki a ser rescata y ta sano y salvo.