Sr. Clifford Rosa presidente di Fundacion Rancho ta duna di conoce cu tin un preocupacion andando for di basta tempo caba y esakinan no ta hayando oido manera ta desea. Ta for di 2018 caba a entrega un peticion na e minister di infrastructura riba kico ta bai pasa y e tempo ey no tabatin desaroyo di e hotel cu tin dilanti di e pier, pero despues di esaki a bin desaroyo di e hotel aki, esta ex-Mar Azul. Como organizacion ta sinti cu no ta haya informacion of respuestanan satisfactorio cu por bisa cu e piscadonan y tur esnan cu tin nan boto mara na e pier aki lota contento cu loke nan scucha. Y esaki a pone Fundacion Rancho den un posicion mucho mas fastioso aworaki y a haci un yamada di preocupacion y toch asina mes riba mesun dia ta haya un reaccion caminda Centro di Pesca Hadicurari ta willing pa bin sinta cu e piscadonan y pa duna contesta probabelmente riba tur e preguntanan cu e organizacion y piscadonan tin. Sr. Rosa a mustra cu segun investigacionnan semper a duna di compronde cu en principio tur loke tin na Aruba ta pertenece na pais Aruba te ora cu yega den un acuerdo. Den e caso aki DOW y Land Aruba a yega na un acuerdo cu APA pa duna APA e oportunidad pa mantene e luga aki, esta un “beheer overeenkomst” pero camind e ta garantiza e acceso na e piscadonan na e pier y vecindario. Dus akinn ta wak cu ta full un entorno rondom di e area mester wordo laga accesibel pa e piscadonan y cu esaki tambe tur e hendenan cu ta bin pa cumpra pisca tambe eynan. Y esaki ta algo cu ta sagrado ya ta cosnan cu a pasa hopi aña pasa caba y berdad ta respeta APA mirando cu e ta e autoridad portuario, pero semper y cuando tin un comunidad serca di e parti aki y e punto ta cu tur e desaroyonan cu a sosode, hopi biaha e comunidad tabata envolucra den dje. Y awor e ta bira algo cu mester bai tene cuenta cune pasobra si e comunidad den vecindario no wordo inclui den e desaroyonan aki, e ta bira tiki peligroso. Pasobra ya con e comunidad den sercania lo sigui transita den su mesun area anto ta esakinan ta trece un sabor amargo y historia semper a demostra cu e comunidad den vecindario semper mester a lucha pa su “pertenencianan” y den e caso aki, mirando e desaroyo cu ta biniendo no por kita afo cu mester sigui lucha pa mantene un parti di e herencia historico kenda conserva y asina garantiza esaki pa generacionnan cu ta bini. “Y sigur un dia APA lo no mester t’asina grandi den su cura y oor ta un tiki mas chikito mirando cu sistemanan mundial ta cambia, e reglanan di ISPS ta cambia y no t’asina cu mester keda sera of haci e cura mas grandi. Pero a cambio bo por haci bo cura mas chikito y duna acceso di bo comunidad na e areanan cu en principio ta pertenece na e comunidad”, Sr. Clifford Rosa a declara. Pa tal motino a yama un reunion dor di piscadonan hunto cu Centro di Pesca Hadicurari Diahuebs 19 di September pa 6’or y tambe e ta un reunion pa sera conoci cu e directiva nobo di Centro di Pesca Hadicurari y nan vision tambe y tambe con nan ta mira e situacion cu e piscadonan di Rancho ta pasando aden. Mester corda cu e pier aki ta un inversion cu Hadicurari mes a haci riba un propiedad cu ta di APA y tur esaki a bai segun palabracionnan verbalmente. Anto esaki, segun Sr. Rosa, ta demostra e union cu tin pa haci desaroyonan pa bai dilanti pasobra nos tur sa cu hopi biaha pa warda riba cosnan oficial, esakinan lo tarda hopi. Anto e ora den esaki por a mustra cu como Fundacion Rancho a pone departamento di Santa Rosa, APA, Centro di Pesca Hadicurari hunto y por bisa cu tempo ey Sr. Rosa mes tabata forma parti di Hadicurari, e no tabata un proceso facil, pero Hadicurari a haci su inversion y aworaki tambe e piscadonan ta haci pregunta ta con ta mantene of kende ta bai mantene. Pues tur e preguntanan aki tin, pasobra piscadonan kier pone luz, kende ta pone, kende ta page dus tur e cosnan aki ta preguntanan cu nan tin y lamentablemente Fundacion Rancho no tin respuesta pa nan.