BARCELONA, Spaña – Tras di a haya su mes implica den un polemica nobo pa corta su camisa y hopi a interpreta cu el a kita e bandera di Spaña, Gerard Pique, central internacional di Barcelona, a anuncia cu e lo sali for di e seleccion na 2018, cu 31 aña, tras disputa den e mundial di Rusia.
“Mi ta cansa cu nan ta duda di mi compromiso. E Mundial di Rusia lo bay ta e ultimo competencia cu e seleccion y mi ta spera di bib’e cu gana,” el a sigura den e zona mixto di Loro Borici Stadium.
“Mi no ta bon ricibi den e añanan aki aunke mi ta duna tur cos y mi ta sigui duna, obviamente tin hende cu ta considera cu mi ho mi no ta. Mi ta hopi ilusiona cu e proyecto nobo di Julen, nan ta bay duna nos hopi, pero mi lo bay sigui te cu mundial. Nos a cuminsa y nos lo caba huntom,” e hungado a añadi cu contra Albania, el a cumpli 86 partido.
Pique a laga sa hopi cla cu su decision no ta fruto di keintamento di banki y cu “e tabata pensando”, pero a bisa cu e ultimo polemica “ta uno mas di hopi.”
“Pa basta tempo mi tin’e den mi cabes y awe ta uno mas, pero no ta pa awe, ta pa e sensacion di duna tur riba campo y hopi hende ta gradici pero otronan no ta parce ta bon. Cu 31 aña mi lo a haci hopi cos tras di gana tur cu e seleccion, nos lo purba gana Mundial y e bida sigui cu Barcelona unda mi kier gana hopi mas,” el a añadi.
Pique a splica e rason dicon el a corta e camisa y incluso a mustra den e zona mixto pa demostra cu nunca e tabata tin e intencion di kita e colornan di Spaña.
“Manera semper mi ta hunga cu camisa largo y no ta hiba ni color cora ni geel, mi a cortanan pasobra e manganan tabata hopi cortico y tabata molestiami. E ta un situacion agotador pero tin cu acept’e, sigui padilanti. Awe tabata un gran resultado apesar di tur cos. Esey ta loke ta pone nos sigui dilanti,” el a lamenta.
Fuente: NTN24