Piloto sospecha di triple asesinato deteni

LOUISVILLE, Merca – Un piloot cu net tabata pa bay subi avion cu e lo mester a bula for di Louisville (Kentucky) pa Charlotte (North Carolina) diasabram a kede deteni.
Autoridadnan a informa cu nan tabata buscando Christian Richard Martin, e piloot di un aerolinea afilia cu American Airlines, pa un triple asesinato na 2015, cometi na Kentucky.
Despues di e asesinatonan di Calvin y Pamela Phillips y su bisiña Edward Dansereau, Martin a muda pa North Carolina pa cuminsa cu’n bida nobo.
Calvin Phillips a wordo haya den su cas na Pembroke, Kentucky, cu su curpa yena cu bala. E curpanan di Pamela Phillips y Dansereau a wordo haya den e auto di Calvin, cu a wordo cende na candela den un plantacion di maishi, na poco miya leu for di e residencia di e pareha.
Autoridadnan a cuminsa sospecha di Martin ora cu esaki a bandona e condado di Christian y a muda pa otro estado.
Martin a traha pa PSA Airlines, un subsidiario di American Airlines, un poco mas di un aña, segun e aerolinea a informa den un comunicado. El a wordo aresta mientras e tabata preparando pa bula como prome oficial den e vuelo 5523 di Louisville pa Charlotte, North Carolina.
Martin a wordo geschors y ta den “suspension administrativo” sperando e resultado di e caso, segun American Airlines.

Comments

comments