SAN FRANCISCO, California – Un avion di Air Canada a logra evita un desastre aereo despues di casi a baha riba un pista di rodahe unda cu tabata tin cuater otro avion. E hecho a keda registra diabierna ultimo na e aeropuerto di San Francisco.
E hecho ya ta wordo investiga pa autoridadnan aereo. Sa cu ta trata di e vuelo AC759 di Air Canada, entre Toronto y San Francisco, cu a baha net prome cu mey anochi.
E Administracion Federal di Aviacion (FAA) a declara riba e incidente cu “e piloto, sin intencion algun, a dispone pa baha riba e pista di rodahe (taxiway C) cu tabata paralel cu e pista 28R, unda cu e tabata supone di a baha. Un controlador di trafico aereo a bisa e piloto pa e dal un buelta, cual el a haci y e avion tabata por a baha sin ningun incidente.”
E combersacionnan entre e toren di control y e piloto a keda registra. Den esakinan por a scucha cu e piloto di Air Canada a bisa e controlador aereo cu e tabata mira otro luz net prome cu el a wordo bisa cu no tabata tin otro avion riba pista, unda cu e tabata supone di a baha (28R).
Den e audio tambe por a scucha ora cu un piloto di United Airlines ta bisa claramente cu e avion di Air Canada a caba di bula directamente riba nan.
“Unda bo ta bay? Bo ta riba e pista di rodahe (taxiway C)”, por a scucha igualmente entre e combersacionnan.
Mientras tanto, FAA a bisa cu e tipo di incidentenan aki ta hopi “straño.”
De hecho, e dependencia ya a cuminsa cu un investigacion pa determina con cerca e avion di Air Canada tabata di e otro cuater avionnan cu tabata tin riba e anochi aki riba e pista di rodahe.
Di su parti Air Canada a asevera atrabes di un comunicado di prensa cu nan tambe ta haciendo e investigacion respectivo.
Di acuerdo cu expertonan, e piloto di e avion di Air Canada, a cada na evita loke por tabata un gran accidente aereo.
Fuente: http://nmnoticias.ca