WILLEMSTAD – Ministerio Públiko (OM) a risibí un informe di un posibel menasa ku un arma di kandela dor di sr. Michael Römer, hefe di servisio di inteligensia VDC.
Prokurador-general (PG), mirando e seriedat di e akusashon i e poseshon di e persona en kuestion, a disidí 11 di òktober 2016, pa duna Landsrecherche e enkargo pa inisiá un investigashon di hechos (feitenonderzoek). Meta di e investigashon di hechos ta pa haña sa kiko bèrdat a pasa i pa identifiká si tin sospecho di un hecho kastigabel.
Ministerio Públiko ta enfatisá ku na e momentunan aki no tin kuestion di un investigashon di rastreo penal (strafrechterlijk opsporingsonderzoek). No a identifiká niun hende komo sospechoso. Informenan den prensa komo sifuera a inisiá un investigashon penal (strafrechterlijk onderzoek) na Landsrecherche, i ku a skucha sospechosonan kaba, no ta bèrdat.