Den un anuncio hopi spera, e compania farmaceutico Pfizer a bisa dialuna cu den un test fase 2/3 a keda demostra cu e vacuna di COVID-19 ta sigur (safe) y a crea basta anticurpa den muchanan di 5 pa 11 aña.
Esaki ta e prome resultadonan di e tipo aki publica pa e grupo di edad menciona pa loke ta un vacuna di COVID-19 na Merc, y e datonan no a wordo revisa ainda ni publica. Pfizer a informa na mesun momento cu nan tin planea pa pronto presenta e resultado aki na Federal Drug Administration (FDA) pa haya autorisacion pa su uzo di emergencia.
E test a inclui 2268 participante di entre 5 y 11 aña y a uza un regimen di dos dosis di vacuna duna cu 21 dia di diferencia. E testnan aki a uza un dosis di 10 microgram, menos cu e dosis di 30 microgram uza pa e testnan di esnan di 12 aña bay ariba.
E reaccion immunitario di e participantenan a wordo midi observando e nivelnan di anticurpa neutralizante den sanger y comparando e nivelnan aki cu un grupo di control di personanan di 16 pa 25 aña cu a ricibi un regimen di dos dosis mas hopi cu 30 microgram. Pfizer a bisa cu e nivelnan ta compara bon cu e esun di personanan mas grandi cu a ricibi un dosis mas grandi, loke ta demostra un “un fuerte reaccion immunitario den e grupo di muchanan aki un luna despues di e di dos dosis.”
“Ademas, a tolera e vacuna aki basta bon, cu efectonan secundario generalmente comparabel y observa den participantenan di 16 pa 25 aña,” e compania a bisa.
Un vocero di Pfizer tambe a confirma cu no tabatin caso di inflamacion di curason cu a wordo relaciona cu vacunanan di ARNm.
Ta bay inclui tur e datonan aki den un presentacion a corto plaso pa Europa y na momento cu haci peticion na FDA pa su uzo di emergencia den muchanan.
Vacuna Pfizer / BioNTech ta awo ta aproba pa personanan di 16 aña of mas, y autorisa pa su uzo den personanan di 12 pa 15 aña.
E compania ta sperando datonan di prueba pa muchanan di 6 luna, probablemente pa e ultimo trimester di e aña’ki.