BEIJING, China – E moneda di China, e yuan, a logra dal un paso mas den su marcha largo pa internacionalsiacion. Desde dialuna 26 maart, e Republica Popular Chines a cuminsa emiti contratonan ‘futuro’ riba petroleo denomina den yuan. A trabes di e Bolsa Internacional di Energia di Shangai (INE), e gigante Asiatico ta lansa su prome instrumentonan financiero deriva di petroleo. E acontecimento ta representa un cambio grandi ariba mercado mundial di energia, según e revista Mericano, Foreign Policy.
Una bes tur e tramitenan burocratico termina, e Chinesnan lo establece e prome referencia di contratonan ‘futuro’ riba petroleo den e region Asia- Pacifico. Despues di supera Merca como e importado principal di petroleo riba scala mundial aña pasa, China ta aumenta su influencia den establece e prijs di e oro preto. Asina, e plasanan financiero di Merca y Reino Uni ta perde e monopolio riba e emision di instrumentonan financiero deriva, relaciona cu petroleo. E biyete berde no ta su so mas: e petroyuan ta debuta den e grandes ligas di finanzas mundial.
Materias prima (‘commodities’) manera petroleo no ta wordo comercialisa solamente riab mercadonan fisico, nan ta wordo comercialisa a trabes di titulonan financiero cu ta wordo adkiri riab e bolsa di balor. E contratonan ‘futuro’, di su banda, ta instrumentonan financiero deriva: nan ta wordo yama asina ya cu nan balor ta basa ariba e prijs di otro activo.
E contratonan ‘futuro’ riba materianan prima (‘commodities’) ta diverso, e ta inclui un gama amplio di activonan: oro, plata, koper, crudo, entre otro. Bou di e cotisacion di dollar, e indice West Texas Intermediate (WTI) di New York y Brent di London tabata e unico referencianan na hora di comercializa contratonan ‘futuro’ riba petroleo.
Awe e Republica Popular Chines ta logrando traduci su poder economico den un protagonismo mas grandi den finanzas internacional. INE a propone su mes pa gana mas autonomia y dicta su mesun reglanan: e emision di ‘futuronan’ denomina den yuan ta permiti China di tin un referencia propio cu ta refleha e prijs di crudo cu su refinerianan ta consumi.
E ‘futuro’ riba petroleo ta sirbi pa e cumprado proteha nan mes di e fluctuacion di prijs: e ta e promesa entre dos partido di cu, den un fecha futuro, e crudo lo wordo comercialisa na un prijs fiho. Na aña 2012, por ehempel, ora cu e prijs tabata supera 100 dollar pa bari, e ‘futuro (contract) ‘ a sirbi di instrumento di cobertura di riesgo ante e posibilidad di subidanan consecutivo di prijs.
Fuente: https://actualidad.rt.com