Yonaiqer Sanchez, Defensor di Derechonan Humano representando Foundation for the Development and Psychosocial Empowerment ta pidi pa anula decision riba un caso civil na unda a dicidi desaloho di cuater siman cu un señora tin pa abandona cas despues di morto di su pareha, cu no ta den acuerdo cu derechonan di e señora aki.
E ley no ta proteha e dama aki y lag’e totalmente desampara. Ta pidi tribunal di prome instancia na Aruba pa activa tur mecanismo internacional, derechonan internacional y local pa por defini cu su derechonan ta y unda e dama por wordo yuda pa e no keda riba caya. Ta pidi hues pa activa tur e instancianan pa defende, promove y proteha derechonan humano cu ta estableci den constitucion di Aruba. E caso particular aki no ta e unico caso tampoco cu ta pasando den situacionnan similar unda ta haci falta di defende y cuida derechonan humano.
Sr. Sanchez a expresa un preocupacion riba locual ta considera un violacion di cierto derechonan humano di un ciudadano comun. Unda a haci uzo di atributos legal pa agredi constantemente di un manera directo y indirecto di e persona segun sr. Sanchez. E kier a trece dilanti un caso caminda segun el a splica durante rueda di prensa, tin un caso hopi serio unda atributonan legal pa legalisa un desaloho forzoso cu consecuencia cu un civil lo keda riba caya.
https://www.facebook.com/masnoticia/videos/465523104421136/
Sr. Sanchez a anuncia cu ta activando un mechanismo di denuncia publico y notorio di locual por a observa di e situacion di COVID19, e situacion ta exigi di e estado un tiki mas flexibilidad den ley, y pa estado tin mas di comprension di e ciudadano durante e temponan aki y analisa pa prome e condicion humano cu tin hopi hende aworaki no tin trabao y sostenebilidad. Pues pa cuestion di COVID19 hende no tin recurso, no tin placa y no tin trabao, y muy poco tin ayuda di gobierno y subsidio. Y pa e motibo aki organismonan di ley, organismonan huridico mester tin un tiki mas flexibilidad den momento di tuma un decision.
Sr. Sanchez a trece dilanti un caso civil di un individual na unda nan ta observando un sentencia [aproba riba 9 di september 2020] cual a wordo haci sin tuma den consideracion e situacion humano di e persona. E ta un persona cu ta den un situacion inhumanitario di cual cu despues di e sentencia, e ta keda den un situacion fastioso. Pues ta trata di un caso civil di un persona cu a convivi pa hopi aña cu un local Arubiano cu a fayece dia 9 di maart 2020. E persona aki ta awor pasando den hopi trato inhumano di parti di e famia y algun organismo legal di e pais, na unda ta legalisa un desaloho forzoso di un acuerdo cu e famia a haya bao menasa y hopi elemento di violencia, maltrato fisico y verbal. E sentencia aki ta obliga e persona pa Sali for di cas den cuater siman.
“Nos kier sa unda e defensa y proteccion di derecho humano ta keda? Unda e defensa cu ta implementa y estableci den constitucion di Aruba ta keda? Nan no por agredi y uza e atributonan legal pa agredi e persona aki y lag’e riba caya den un situacion inhumanitario”, segun sr. Sanchez a expresa.
Igualdad social
Sr. Sanchez a trece otro punto dilanti riba e ley cu ta haci falta den nos codigo civil caminda un persona bao coviviencia no tin derecho, no tin proteccion di e ley na unda esaki ta afecta igualdad social y agredi e derechonan di hende muhe den e caso particular aki. Den e caso aki cu ta envolve morto, no tin nada pa proteha e persona cu tabata biba hunto cu ne cu a keda totalmente desampara pasando den un trato inhumano un siman despues cu su pareha a muri. “Tur persona tin derecho na libertad di penas, tratos, torturas inhumanas crueles y degradantes segun estableci den convencion di Union Europeo articulo 3. Esey ta algo cu tur abogado y persona huridica den e pais tin e obligacion di defende y garantisa esak, cual ta un derecho universal”, sr. Sanchez a splica.