Famia y su partner a informa awe lo siguiente” “Peter a lucha te na final, pero no por a logra gana e bataya. Rondona pa famia cu a stim’e, el a fayece. Nos ta inmensamente orguyoso di dje y na mesun momento inconsolabel.”
De Vries a wordo tira den oranan di anochi den Lange Leidsewarsstraat, den bisindario di Leidseplein cerca di un garashi di estacionamento. Mas o menos 100 meter leu for di e studio di RTL Boulevard, unda cu de Vries tabata presente e anochi di tiramento.
Tin dos sospechoso deteni ainda relaciona cu e tiramento. Ta trata di un homber di 35 aña di Maurik y un mucha homber di 21 aña di Rotterdam. E ultimo aki probablemente ta esun cu a los e tiro fatal mientras cu e otro tabata maneha e auto den cual a huy for di e sitio.
E motibo tras di e asesinato no ta mucho cla ainda. Abogado Inez Weski a expresa den media cu ta busca mucho lihe direccion di Ridouan Taghi, kende el a representa den e proceso penal di likidacion conoci como Marengo. Den esey Taghi ta e sospechoso principal. E lo tabata esun cu a duna e ordo pa un serie di likidacion, den cuadro di un negoshi internacional di cocaina.
Peter Rudolf de Vries a cuminsa cu su carera periodistico inmediatamente despues di su scol secundario cu De Telegraaf. Un caso di asesinato cu a tuma luga na Den Haag a lanta su interes den periodismo riba tema di criminalidad. Den e 35 añanan cu a sigui el a investiga mas cu 500 dossier di asesinato y a bira un di e periodistanan mas conoci di e pais riba e tereno aki.