E unico preocupacion cu Hulanda a bin ta vocifera ta e pasonan cu mester wordo tuma den e bon direccion cu Aruba tin cu tuma pa yega na un finanza publico manehabel. Minister di Finanza, Sra. mr. Xiomara Maduro ta splica.
Sigur e gastonan personal ta un cu ta pisa hopi y cu ta crece hopi lihe. Den cuadro di esey, negociacionnan ta tumando luga unda cu Prome Minister a bay Hulanda cu e maneho riba e parti politico riba esaki. Y na Aruba ya caba tin un comision institui bou liderasgo di Minister President.
E comision aki ta bay bin cu algun recomendacion di cual un par a bay caba den direccion di Ministerraad, pa asina por bay busca desicion riba nan pa trece na bista kico ta premira cu e toolsnan cu mester implementa pa baha e gastonan personal.
Mas cu claro un di e preocupacion cu tambe mester wordo soluciona ta e parti di ‘overtolligheidspoel’, dus e hende cu ta na cas y cu nan por traha y mester wordo poni na trabou. Minister Presidente a informa cu ta tumando e pasonan pa cu esaki, pero den e ultimo rapport di CAFT cu e asunto aki ta un cos di langere adem, pasobra no por keda cla den 6 luna, caminda cu por ehempel Minister Xiomara tabata tin consehero na su bureau, cu e tin cu keda paga te Augustus, siendo cu mayoria di nan trabou tabata cambia cifranan pa manda CAFT y esey no ta Minister actual su sistema.
Den todo caso, e decision cu ta tuma awe riba nivel personal, no ta nifica cu mañan ta bay tin menos costo. Tin cosnan cu mester tempo prome cu por realisa cu esaki, caminda cu tabata tin 8 aña largo cu a bay sheef y dwars, y no por spera cu den 6 luna por drecha esaki caminda cu mester tin espacio y coherencia pa bin cu un plan realisabel cu no bay haya un problema mas grandi cu esun cu tin caba.
P’esey a bin cu un Crisis Social Plan y e presupuesto 2018 tin un monto extra di 10.8 miyon extra den gastonan di personal y claro, siendo cu ora tin crisis social ta traha cu hende y no por manda robot pa papia y soluciona e problemanan. Mester wak kico tin pa tras di e gastonan aki anto busca con pa soluciona y no ta cosnan cu ta wordo resolvi di biaha. Ta keda atende e problema como gobierno y ta tuma decisionnan pa e bienestar di pais Aruba, pero hende ta central y mester duna spacio pa haya solucion na nos mesun hende. Te asina leu, declaracionnan di e mandatario di Finanza, mr. Xiomara Ruiz- Maduro.