Ta conoci cu hopi hende ta trahando part-time na dos caminda. Y si e persona tin permiso di trabao, esaki tin varios regla, dependiendo di ki permiso di trabao e tin. Sra. Cherylldine Buckley, vocero di SvB ta amplia.
Un persona cu tin permiso pa traha na cas, no por haci otro trabao. Y un persona cu ta traha na hotel, y e kier traha un otro trabao despues di su trabao, esey tampoco no por, segun ley di DIMAS. Loke ta pasa e ora si, un persona tin un permiso di trabao, trahando na X-compania y e tin permiso liber, e por haci un trabao extra. E ora tur dos compania tin cu paga su SVB pa e trahado. Si e trahado cambia di doño di trabao, of traslada di un compania pa otro, mester avisa esaki.
Ta importante pa compronde cu si e persona, sea local of un persona cu permiso liber, mester ta inscribi na SVB pa tur dos trabao. E persona ta sigura pa un trabao p.e. na un tienda den dia, y no trahando na restaurant anochi. Si e persona haya un accidente sin ta sigura na e di dos trabao, SVB no por cumpli cu e pago di accidente na pia di trabao.
Gran mayoria di persona cu ta traha cu permiso na Aruba, ta haciendo dos trabao y den e caso aki, mayoria tin hasta cu nan doño di trabao no ta ni paga nan belasting pa nan, pa cual Sra. Cherryldine Buckley ta splica cu e seguro di malesa ta si e persona bira malo, y e no por traha, SVB ta paga un parti te ora e persona por traha bek. Un gran cantidad di persona tin dos trabao, y si tin permiso liber, e no ta problema.
Peticion ta bay pa esun cu ta traha dos trabao, pa inscribi na SVB. E problema ta cu si e persona ta depende di un permiso di DIMAS, e ultimo aki ta exigi pa e persona traha un solo trabao. Ley di seguro ta exigi pa e trahado tin un seguro di malesa of accidente, pa bienestar di e mesun trahado, segun Sra. Cherryldine Buckley, vocero di SVB.