Actualmente nos ta den temporada di haci declaracion di inkomstenbelasting. Entrante Dialuna, 26 di October, DIMP lo cuminsa yuda tur hende grandinan di edad 60 aña of mas pa yuda nan cumpli cu e deber di yena y entrega e formulario di declaracion di Inkomstenbelasting.
E ta inicia dia 26 di October y lo sigui durante 5 siman, parti mainta di 8’or di mainta te cu 12’or di merdia, te cu dia 27 di November. Ta spera di por yuda un gran parti di e hende grandinan pa nan tambe por keda cla cu esaki. Pa participa den esaki simplemente mester haci un cita Online. Tin hende grandi cu kisas tin dificultad pa haci cita Online pasobra bo mester internet y computer. Pa esaki, DIMP ta haci un apelacion na miembro di famia of amistadnan pa yuda nan pa traha e cita Online. Si acaso tog esey no ta logra, e cliente por yama na 522 7423 of 522 7424, tin un team cu ta yuda tur cliente cu tin e necesidad pa traha e cita. Simplemente no por atende ningun cliente sin cita pasobra unabes accepta ‘walk ins’ e ta bira dificil pa controla e cantidad y lo ta actuando contra regla di DVG.
https://www.facebook.com/masnoticia/videos/351023202646402/
Den añanan anterior semper DIMP a yuda tur cliente di tur edad cu tabata of tin dificultad pa yena e formulario aki. E aña akinan lamentablemente DIMP ta hopi limita den dunamento di servicio pa motibo cu e campaña di ayudo ta genera un publico hopi grandi. Den pasado nan tabata yuda 3000 persona den dos siman, aworaki esaki no ta posibel pa permiti, den cuadro cu e ‘normal nobo’. Normalmente e tabata asina cu ta organisa esaki den dos siman cu un team cu ta bay San Nicolas, otro team cu ta bay Biblioteca Nacional Oranjestad, pero e biaha aki e servicio lo ta unicamente na Camacuri unda tin e cambernan designa cu proteccion tambe pa e empleadonan. “Door cu e cantidad di cliente cu nos por yuda ta mas limita, nos a amplia tambe e periodo cu nos ta yuda, enbes di dos siman e ta bira cinco siman, y na final di e cinco simannan aki nos ta spera di por yuda 900 cliente”, segun Meverly Romano, vocero di Departamento di Departamento di Impuesto ta splica Masnoticia.
Traha cita Online
DIMP a amplia e servicio aki caminda cu na e bali di recepcion e clientenan por entrega nan declaracion di aña 2019. Si e cliente ta entrega mas declaracion, e ora ta tuma esaki na bali di recepcion pero te cu tres aangifte pa cada persona. E motibo di esaki ta cu segun reglanan di DVG, un persona no mag di keda largo na e bali. E mester por yega, haci loke el a bin pa haci, y den un par di minuut e mester bay. Pues si acaso un persona bin entrega mas cu tres declaracion, ta pidi pa haci un cita, pero por haci un cita cu hasta entrega di un declaracion. E cita ta wordo haci via website di DIMP unda tin un tab ‘Afspraak Maken’ ,bo ta escohe servicio desea y bo ta haci un cita Online. Dibiaha ora caba di haci e cita bo ta haya un email di confirmacion, ki fecha y ora. “Esaki ta funcionando tremendamente bon”, sra. Romano ta expresa.
Tin hende ta haci cita pa busca plachi di number, otronan pa entrega formulario di declaracion, si tin cliente cu winstbelasting of dividentbelasting DIMP ta tuma esaki tambe. Si un cliente kier haci un cita pa busca un aangifte, no tin mester un cita pa busca un duplicado solamente mester haci e peticion adelanta via mail, anto e ora ey e ta wordo yama pa wordo notifica riba ki dia e por pasa busk’e.