Na 2016, durante e tratamento di e cambionan pa saneamento di e seguro di malesa y accidente, parlamento di Aruba a pasa den e ley, un amienda, caminda a otorga SVB e autoridad pa den caso di violacion di e ley di seguro di malesa y accidente, e posibilidad pa por duna un boet administrativo, segun Ing. Edwin Jacobs, director di SVB. E ta amplia mas ariba esaki.
Esaki a wordo poni den e ley den e articulo 14 dedica na seguro di malesa y accidente. Na momento cu parlamento a habri e espacio pa otorga un boet administrativo, esaki kiermen cu parlamento a pasa pa sanciona un violacion di ley. Y ora cu bo ta den e ambito penal y pa segun bo leynan, cierto momento, bo mester tin personanan cu tin conocemento di e procedura penal tambe pa ora di impone e multa aki. Sr. Jacobs ta sigui bsia cu anteriormente, ora cu tabata tin e casonan akinan, bo mester a percura pa tin trahadonan cu tin estudio di Buitengewone Agent van Politie. Pero desde 2013 esaki a wordo cambia pa BOA (Bijzonder Opsporings Ambtenaar). E ora eynan, SVB mester a percura pa e coleganan cu ta bay traha e tereno akinan a sigui e estudio di BOA, pa asina nan tin e conocemento y ora cu nan topa den practica, casonan di violacion di malesa y accidente, nan por a sigui e procedura manera cu e ley ta bisa, pa asina bo boet tin su base legal. Basicamente, e ora ey, despues di un trayectoria largo, esaki ta prome biaha cu Politie Opleidingsinstituut a bin cu e opleiding aki. Tabata tin yen di rekisito cu mester a cumpli cun’e, banda di e verklaring di goedgedrag, bo mester a wordo gescreen pa wak bo background.
Y asina ey, na october 2017, 21 colega di SVB a inicia e estudio di BOA akinan. Y siman pasa, 19 colega a gradua. Esaki ta nifica cu tin 19 persona den SVB cu proximamente lo percura pa haya nan Landsbesluit corespondiente. Y ora nan subi caya nan por sigui henter e procedura penal, traha un procesverbaal. Y a base di e pv aki, SVB lo duna un boet administrativo, manera e ley di Seguro y Accidente ta prescribi.
Prome cu e personanan aki por subi caya y haci e trabao, nan mester tin un Landsbesluit, caminda nan ta wordo indica cu nan ta Bijzondere Osporingsambtenaar y nan mester haya un carnet door di Ministerio di Husticia cu ta indica tambe cu nan ta Bijzondere Opsporings Ambtenaar. Pero prome cu nan subi caya nan mester huramenta dilanti ministerio di Husticia pa haci e trabao aki.
Esaki ta hiba SVB na e siguiente nivel den e siguridad social y proteccion pa trahadonan. Si anteriormente, ora cu topa cu casonan cu doñonan di trabao no inscribi trahado, mester haci uzo di diferente argumento pa convence e doño di trabao, pa inscribi e trahado pa e traha cu proteccion. Primeramente ta spera cu e ta uno di prevencion. pero na momento cu e no preveni, tin e parti represivo tin e boet administrativo, pa asina percura pa trahadonan ariba Aruba, por traha cu e proteccion necesario. Pero tambe den SVB su afan, den nan aspiracion pa alcansa na Aruba tambe, pa mundialmente e ta wordo aspira, siguridad social pa tur.
Ley ta prescribi pa e duna tur informacion necesario na SVB, ora cu e solicita esaki. Y en caso cu tin resistencia, por yama polis tambe pa compaña e trahado di SVB. E doño di trabao no por nenga SVB acceso na informacion, segun Ing. Edwin Jacobs, director di SVB.