Dialuna pasa di 10:30 mainta alarma a keda activa na Palm Island unda un turista femenino pasando su dia na e isla a bira malo den lama na momento di tabata snorkel y guli basta awa. E personalnan di Palm Island activo pa cualkier novedad riba lama a mira e señora boca abou no ta move y a bula drenta lama y a saca e señora for di awa y cuminsa cu reanimacion y a raporta na autoridad.
Cu urgencia Centro di Alarma a despacha unidad di ambulance, rapid responder y e hefe di ambulance pa presenta riba e isla mientras cu e personal di Palm Island tabata den reanimacion. Asina e paramediconan a subi e boto bay direccion e isla y a sigui cu e parti di reanimacion y pone e persona na mashin pa duna su curason un shock.
Ta un señora di alrededor 65 aña e paramediconan a traha duro y a logra haya pulso despues di basta rato. Asina a transporta e victima bek pa tera y cu urgencia Ambulance a transporta e victima pa hospital. Ta trata di turista di vakantie for di Europa. Un bon trabou di e personal di Palm island cu nan reaccion basta lihe y cu ta tira bon bista riba tur e personanan cu drenta lama pa si algo pasa nan drenta accion di biaha.