Den cuadro di siman di ambulans nos a papia cu Sr. Bryan Mohamed, un verpleegkundige cu ta splica con e trabou ta y kico ta e retonan cu tur dia ta pasa den dje.
Primariamente nan trabao ta di stabilisa y di dos nan ta e wowo y e orea di e dokter cu ta bay ricibi e pashent. Dus, esey ta mas tanto e trabao cu nan tin ariba ambulance.
Kico ta e rol cu e personal di ambulance tin ora cu nan yega na un luga? Sr. Mohamed a splica cu esey no ta wordo haci mas. Aworaki nan ta stabilisa e pashent prome, y si e no mester wordo stabilisa, ta gewoon cumpli cu e opdracht cu nan a haya, sea hiba hospital of hiba gipskamer.
Pero den caso di emergencia, mester stabilisa e pashent conforme e protocol existente riba ambulance. E presion di parti di famia of mirones, cu no ta laga e personal di ambulance ehecuta nan trabao semper tey. Aunke awo Cuerpo Policial ta yuda pa mantene e mironesnan ariba distancia pa haci nos trabao. Tambe Cuerpo Policial ta dispuesto pa yuda personal di ambulance. E presion di parti mirones aworaki a baha hopi.
Tur e añanan cu Sr. Mohamed tin di experiencia, e por bisa cu nan a crece enorme. Tur personal di ambulance a haya un opleiding. Antes tur personal tabata tin opleiding, pero no ariba e nivel actual. E nivel di awo ta e nivel cu ta wordo exigi na Europa, y otro paisnan.
Tambe segun Sr. Mohamed, nan ta traha conforme protocol y di tres, nan tin un dokter cu semper nan por conta ariba dje. Sea e dokter di Imsan of sea cu ta na warda. Antes compara cu awo, awo personal di ambulance tin echt e protocolnan cu nan por cuminsa stabilisa e pashentnan prome cu nan transportanan.
E trabao di ambulance no ta un trabao asina asina. E ta un trabao cu hopi responsabilidad. E persona cu ta haci esaki tin hopi responsabilidad ariba su lomba. Los di esey tambe, huridacamente bo por wordo poni responsabel legalmente si algo bay robes. Continuamente, e personal di ambulance mester ta atento y continuamente mester evalua cada paso cu mester tuma cu e pashent, segun Sr. Mohammed a splcia.