AMSTERDAM, Hulanda- Personal di ambulans den Hulanda completo lo haya vestnan anti bala y resistente na hinca, y tambe helm. Tur e servicionan regional di ambulance ta sigui e conseho di Ambulancezorg Nederland pa busca paña protector.
E vestnan lo mester proteha e personal den situacionnan di insiguridad y tambe den momentonan di terorismo. E dunadonan di cuido no ta obliga di bisti e vestnan aki, ta keda na nan pa calcula cada situacion. No ta conoci si den pasado tabata tin cualkier incidente asina aki, na Ambulancezorg Nederland caminda cu e personal tabata tin mester di un bulletproof vest asina aki.
Carnaval
Servicio di Ambulance di Zuid- Limburg, segun 1Limburg, lo ta e prome servicio di ambulance di Hulanda cu lo bay bisti un vest asina aki. “Nos no por cera nos wowonan pa e menasa di terorismo den e paisnan rond di nos’, segun un vocero di e servicio di ambulance. “E ta yegando cerca”.
Tur 150 trahado lo haya un vest traha na nan midi. E dunadonan di cuido lo tin te cu 16 di november pa pas un vest y despues un compania na Deventer lo traha e vestnan aki, cu lo mester keda cla ainda pa e aña aki. Servicio di Ambulance ta haci apelacion na e personal pa bisti e vestnan aki tambe durante eventonan grandi manera carnaval.
Otro servicionan di ambulance regional a duna di conoce cu nan lo cumpra e vest y helmnan aki. Pero ta keda na cada servicio pa dicidi ki dia nan lo haci esaki.
Belgica
Na Belgica personal di ambulance ya caba pa basta tempo ta bistiendo e vestnan aki. Na 2015 personal di cuido di Aalst a ricibi paña protector despues cu nan mes a pidi pe. Tambe na Antwerpen e personal di ambulance ta bisti vestnan protector, contra bala y hinca.