Diaranson atardi, un persona a fayece despues cu, di un manera of otro, a drenta den contacto cu un motor den operacion di un avion riba un plataforma di e aeropuerto di Schiphol, segun Koninklijke Marechaussee, cu ta investigando e incidente.
“Awe a sosode un teribel incidente caminda cu un persona a caba den motor di un avion,” vocero di Schiphol a comenta. “Nos pensamentonan ta cu e famia di e victima y nos ta brinda sosten n’e pasahero y e coleganan cu a presencia e suceso tragico aki.”
E avion envolvi tabata un Embraer 190 di KLM cu destino pa Billund, Dinamarca, identifica cu e number di vuelo KL1341, cu tabata programa pa lanta vuelo pa 2’or y 25 di merdia, segun e website di Schiphol.
Tur e pasaheronan y e tripulacion di e vuelo aki mester a baha y ta ricibiendo asistencia, segun Marechaussee. A pone sosten psicologico y ayudo di emergencia na disposicion di e pasaheronan y e personal di aeropuerto.
E asistencia aki ta ofrece un ubicacion designa dentro di aeropuerto, segun un vocero di Marchecaussee a indica, kende a añadi cu e pasaheronan tambe por ta “testigo importante: cu por colabora den e investigacion.
E OFicina di Investigacion di Siguridad (OVV) a manda tres di su miembronan pa Schiphol pa investiga e incidente.
Sin impacto den e operacionnan di aeropuerto
Te asina leu, e incidente no a afecta e operacionnan di vuelo den e aeropuerto segun un vocero di Luchtverkeersleiding Nederland (LVNL).
Minister demisionario di Infrastructura y Maneho di Awa, Mark Harbers, tambe a reacciona riba e incidente, cualificand’e como “noticia horibel” riba su cuenta di X. “Mi condolencia ta bay n’e famia di e victima y e testigonan di e accidente,” Harbers a skirbi.
KLM ta hiba e pasaheronan Dinamarca cu un tripulacion di reserva
KLM a reubica e mas di ochenta pasaheronan di e vuelo envolvi den e incidente mortal di diaranson den un vuelo alterno. E avion nobo a yega Billund, Dinamarca, poco prome cu 9’or y mey di anochi.
P’e salida nobo aki, cu a sali cerca di 8’or y mey di anochi for di Schiphol, KLM a uza un tripulacion di reserva, segun un vocero di e aerolinea a informa. E vocero a menciona cu e incidente di diaranson atardi tabatin “un gran impacto” riba e tripulacion cu tabat abordo di e avion ora cu e accidente a sosode.
Director ehecutivo di KLM, Marjan Rintel, a describi e suceso como “un incidente horibeo.” Te aworaki, no tin un claridad con el a sosode ni a revela e identidad di e persona cu a fayece.
KLM a ofrece sosten psicologico na e pasaheronan na nan yegada na Dinamarca y a facilita transporte na nan cas, si tabata necesario, segun e vocero.
Te asina leu, tur e pasaheronan cu tabata abordo diaranson atardi, a wordo traslada pa Dinamarca mas laat riba e mesun dia.
