Willemstad Curacao: Djamars den oranan di mardugá un unidat polisial ku tabata kore riba Schottegatweg-Noord a tuma nota di dos vehíkulo sospechoso i a duna e shofùrnan òrdu pa para.
E shofùrnan no a duna oido na esaki i inmediatamente a kuminsá un persekushon i ku yudansa di un otro unidat a logra para un di e vehíkulonan aki riba e krusada Schottegatweg-Noord/Suffisantweg. Durante di kontrol riba e vehíkulo aki, a bin topa den e outo aki:
1 shotgun;
6 pistol;
Un kantidat grandi di munishon;
184 kilo di kokaina i 11 kilo di mariwana.
Na e sitio a detené alrededor di 01.35’or, e hòmbernan L.M.Q.Y di 16 aña i B.G.Y. di 19 aña, ámbos nase na Kòrsou.
E otro vehíkulo a sigui kore bai i den besindario di Bullenbaai e okupantenan a baha bai, drenta mondi i los algun tiru riba polis.
Kontinuando ku e investigashon a tene un entrada hudisial na diferente adrès i a konfiská 18 mil florin na plaka kèsh.
A konfiská mas leu tur droga, arma i e dos vehíkulonan.
Investigashon den e kaso aki ta kontinuá.