Segun un publicacion recien di abogado Olivia Sjiem Fat, ta asina cu un permiso di DIMAS no por wordo automaticamente rechasa pasobra e aplicante ta positivo pa HIV.
Masnoticia a tuma contacto cu e abogado pa un reaccion riba esaki. Ta asina cu riba 19 di October, 2020, corte di prome instancia a dicta un sentencia interesante segun Sjiem Fat. Un prome permiso pa keda temporalmente a wordo rechasa door di DIMAS pasobra e departamento di enfermedadnan contagioso [DBZ] a duna un aviso negativo riba esaki.
Segun DIMAS, e apelante ta sufri di un enfermedad contagioso, el a test positivo pa HIV durante examinacion medico mandatario.
E apelante ta bisa cu e no ta sufri di ningun enfermedad contagioso, no tin un virus HIV activo pasobra e enfermedad ta bao di control cu medicacion. E ta bisa cu DIMAS automaticamente ta tuma conseho di Departamento di Salud Publico [DVG] ora di duna permiso di residencia of no.
Segun ley, si ta basa riba opinion di experto [ den e caso aki DVG su opinion ], un cuerpo di maneho mester ta satisfecho den e contexto di cuido necesario, cu e conseho aki ta cuidadosamente haci, cu ta provee bon informacion apropiado segun e contenido. E persona den cuestion akinan ta bisa cu un opinion negativo di DVG sin mas evaluacion ta yega na un rechaso di e permiso cu a pidi p’e, e no a cumpli cu su obligacion pa sigura cu a cumpli cu ne. Anto esaki a haci cu a yega na un decision descuidadamente.
Corte ta haya cu HIV no ta inclui den lista di enfermedadnan contagioso den e ‘Land regulation Contagious Diseases LBZ of den e decisionnan nacional implementando articulo 4 di LHA.
AIDS ta menciona den e decision nacional. Corte ta considera cu e ta un hecho di conocemento general cu HIV y AIDS ta dos diferente diagnostico. Corte ta referi na e descripcion di HIV/AIDS uza por medio di WHO.
Por wordo conclui cu e apelante no ta sufri di enfermedad contagioso, e tampoco no ta inclui den e LHA of den e decisionnan di LHA implementando articulo 4 di LHA. Cu e beleid aki incluyendo e Admission Handbook 2018, e acusado no ta permiti pa extende reglanan legal. Apelacion ta declara bon funda.
Esaki segun abogado Sjiem Fat, ta mustra cu e legislacion na Aruba ta enormemente anticua y mester un update. Specialmente ora cu ta yega na desaroyo medico, no por basa nos mes riba un ley di mas cu 30 aña pasa.