Diaranson Minister di Turismo, Salubriad Publico y Deporte Sr. Dangui Oduber a reuni cu Gerencia, CEO, manager financiero conhuntamente cu e Hunta di Supervision di Aruba Ports Authority na Cocolishi. Den e reunion aki e cuenta anual di aña 2020 di APA a keda presenta na e mandatario.
Minister Oduber a señala cu mescos cu otro companianan estatal, aña 2020 no tabata un aña facil pa APA. E pandemia a afecta entradanan di APA grandemente den aña 2020 pero apesar di tur cos APA a sa di maneha su gastonan responsabel y na e miho forma posibel. E mandatario a mustra riba e hecho cu desde 13 di maart di aña 2020 APA no a ricibi ningun barco crucero y e barco cruceronan aki ta forma parti instrumental di e entradanan cu APA ta genera.
Tambe debi na e pandemia cruceronan a dicidi di cancela tur nan itinerario den aña 2020, y tabata te na luna di juni di aña 2021 cu a ricibi e prome barco crucero bek. Pues esaki tabata tin consecuencia financiero severo pa APA.
Apesar di tur cos APA ta keda hopi positivo pa aña 2021 y sigur aña 2022 caminda lo bay tin proyectonan cu lo bay crea hopi cupo di trabou asina minister Oduber a trece dilanti. E proyectonan aki lo bay yuda na stimula e economia, trece placa den caha di Gobierno. Tin proyecto manera “Gateway 2030” na Airport y APA tin diferente proyecto na e waf di Barcadera caminda nan lo kier diversifica nan entradanan. Tambe APA tin deseonan pa discuti e plannan pa waf di San Nicolas.
No obstante cu tur e retonan cu aña 2020 a trece cu ne APA a realisa un perdida di 1.4 miyon florin, esaki ta danki na e proactividad di APA pa mantene e gastonan abou. Minister Oduber a keda masha satisfecho cu e presentacion cu el a ricibi di gerencia y Hunta di Supervision di APA. Minister Oduber tin pleno confiansa cu APA ta bay conoce miho añanan den futuro.