Investigadonan medico na Pentagono a crea un microchip cu por detecta COVID-19 ora cu inserta esaki bou di cuero.
e tecnologia revolucionario a wordo crea door di “Defense Advanced Research Projects Agency” cu ta opera bou capa di Pentagono, di acuerdo cu un informacion cu a pasa diadomingo anochi den e programa “60 Minutes.” E unidad ultra secreto a wordo lansa durante Cold War pa studia tecnologianan emergente pa uzo militar – entre nan, innovacionnan pa defende soldanan di armanan biologico.
Dr. Matt Hepburn, un dokter di malesanan infeccioso y un coronel di ehercito pensiona, a revela cu e microchip, cu no ta den uzo na gran escala pafo di Departamento di Defensa, por detecta COVID-19 den un persona prome cu e por cuminsa plama e virus.
Den e entrevista di “60 minutes”, Hepburn a bisa “nos ta reta e comunidad di investigacion pa bini cu solucionnan cu por mustra manera ciencia ficcion.” el a bisa cu su rol den DARPA ta pa “kita pandemia for di mesa”.
El a compara nan microchip manera e alerta cu ta aparece riba dashboard di un auto cu ta mustra un señal pa “check engine”.
A pesar di teorianan di conspiracion cu ta bisa cu Bill Gates di Microsoft ta uzando vacuna como un vehiculo pa hinca un microchip den curpa, “60 Minutes” a clarifica cu e chip di DARPA no ta “detecta cada movecion”. E no ta wordo administra via hangua, manera ta wordo bisa rond.
“E ta un sensor,” Hepburn a bisa coresponsal di CBS Bill Whitaker. “E cos berde chikito ta hinca bou di e cuero y loke e ta bisabo ta si tin reaccion kimico den e curpa y e señal ta nifica cu lo bo bay tin sintomanan mañan.”
E microchip, hinca den un tejido di gel, ta diseña pa continuamente test e persona, di e chip, su sanger pa presencia di e virus. Unabes cu detecta Covid-19, e chip ta manda un alerta pa e pashent haci un test di sanger mesora, cu e persona mes por haci pa confirma e resultado positivo.
“Nos por tin e informacion ey den tres pa cinco minuut,” Hepburn a bisa. “E tempo di deteccion y diagnostico, ta duna espacio pa stop e infeccion di sigui cana.”
E segmento a mustra tambe un tecnologia cu ta permiti un mashin standard di dialisis pa saca COVID-19 for di e sanger uzando un filter special. Sanger ta pasa via di e mashin, ora cu ta detox esaki, djey pump e bek den e curpa den un fluho continuo te ora cu e curpa saca e virus completo.
Nan a duna ehempel di e caso di un militar cu nan a yama “Pashent 16” kende a sobrevivi un atake fuerte di e malesa, incluyendo fayo di organo, danki na e mashin di dialisis. E tratamento a dura cuatro dia y despues Pashent 16 a recupera completamente.
Cientificonan di DARPA ta bisa cu e investiga ta masha importante pa preveni epidemia den cuartelnan militar cu hopi hende, manera esun cu a sosode riba USS Theodore Roosevelt na maart y april 2020, unda cu 1271 persona a test positivo pa coronavirus.
Pentagono su investigadonan ta sigui studia COVID-19, y hopi di su investigacion tabata di ayudo pa stop e pandemia, incluyendo metodonan nobo pa detecta y desaroya anticurpanan den mas o menos 10 siman – hopi menos di e seis pa 24 lunanan cu e tabata antes.
E speransa ta pa eventualmente cera e gap entre deteccion nobo di e malesa y desaroyo di vacuna.