Curacao International Film Festival Rotterdam a nomina un pelicula Arubiano pa e Caribbean Shorts Award. Ta trata di e short film titula: E Yobida di Ayera. Skirbi y dirigi pa Armand Simon, e film ta describi un momento crucial den bida di e hoben Monica. E ta namora di su amiga, den secreto. Pero e ta determina pa cambia esaki. Awe solo lo bay briya.
Na 2016, e CIFFR a cera un acuerdo cu 6 festival di cine den region Caribense y tin como meta pa intercambia experticio y experiencia y pa desaroya talento riba e tereno di cine. Despues di a sali ganado di e competencia local, cu un total di 10 participantenan di Aruba, Corsou y Suriname, E Yobida di Ayera awor lo representa Aruba den competencia cu 6 otro nominado di e paisnan Cuba, Republica Dominicana, Guadeloupe, Martinique, Mexico y Trinidad & Tobago.
Anterior na e nominacion di CIFFR, E Yobida di Ayera a ricibi varios premio. Durante e Aruba Short Film Festival 2016 e film a gana premio pa miho short film, miho producer y miho actor femenino.
Actornan principal ta Kyara van Romondt (Monica) y Sabrina Tromp (amiga), ambos ta studiante di actuacion na Da Vinci Academy. Otro actornan ta Lola van Dijk y Darryl de Vries.
Screening di E Yobida di Ayera lo tuma lugar riba 7 y 8 di April, durante e di 6 edicion di e Curacao International Film Festival Rotterdam.