Durante un mainta di informacion di garoti blanco strepi cora, nos cliente Pedro de Cuba miho conoci como “Piet” a hiba palabra y a conta su testimonio y experiencia cu su demas colega y clientenan di FAVI.
Apesar cu bo ta haya e informacion di tempran for di FAVI, cu e dia lo yega cu bo lo mester cuminsa uza un garoti, toch bo ta warda y bo ta purba mobilisa sin dje, Despues di a dobla diferente palo di luz cu mi frenta, mi a dicidi di cuminsa uza e garoti. Tin biaha berguensa of e pensamento di “ Awo si mi ta inutil” ta strobabo. Dia cu mi a dicidi di cuminsa cana cu e garoti, tabata mescos cu dos saco di cement cu mi a carga pa un tempo largo cumi a pone riba vloer. E tabata un yudansa grandi pami.
Uza un garoti como guia no ta bay automaticamente. Bo tin cu train pa bo sa con pa uz’e. Mi a haya e oportunidad di FAVI, pa bay afo na dos ocasion pa haya guia mas extenso con pa uz’e.
Amigonan y famia cu tabata rondonami a aplaudi mi decision pasobra nan a mira e cambio mesora. Nan a admira e curashi cu mi a tuma. Mi ta cliente di FAVI pa 37 aña . Mi no a para keto mi a keda activo. Mi a traha , mi a sigui curso, mi a duna les y mi ta haci tur cos independientemente.
Tur mainta prome mi sali for di mi cas, mi ta pidi Dios danki pa e dia di awe y mi ta pidie pa e cuidami y protehami. Esey ta mi forsa y ta dunami e curashi. Nunca mi no ta lubida di haci esey.
Hopi hende ta keda asombra con mi sa unda mi ta bai. E triki ta pa explora pa scucha, pa sinti e ambiente por ehempel e parhanan cu ta canta den e matanan bandi misa di Playa. Mi conoce nan tur. E stupi gasta cu su buraconan mi sa bon pa unda no stap. Ora cu tin construccion di caminda, esey ta pami un oportunidad pa train. Mi tin un mapa den mi cabes di Playa, cada zonido cu mi scucha cu e tik di mi garoti ta yuda y ta guiami. Mas cu claro semper mi ta den contacto cu e hende. Mi conoce hopi hende cu ta yudami y sin cu mi a pidi pe. Mi ta aprecia cada lift cu mi sa haya ora nan mirami ta cana cu mi garoti bay cas y tambe cada splicacion ora mi ta rumbo pa un destino.
Mi banco conocemi bon, y nan ta percura mi haya mi servicio sin problema. Si bo puntra pa ayudo hende lo yudabo.
Mi kier encurasha otronan cu kisas tin nan garoti caba, pa nan uz’e miho. Sali di cas sea den grupo of bo so y siña haci’e bo mes, pasobra ningun hende no por uza e garoti pabo.
FAVI den cuadro di celebracion di dia internacional di garoti blanco strepi cora, ta informa nos comunidad y tur persona cu limitacion visual di e importancia di un garoti. Pa mas informacion of uzo di e garoti blanco strepi cora por tuma contacto cu FAVI na 5825222 of 5825051.
Si bo mira un persona cu un garoti di guia, dune su chens pa e explora y corda cu e persona aki no ta mirabo bon of no ta mirabo mes.
Duna su espacio y si por aserk’e y puntr’e si e mester yudansa.