Willemstad Curacao: Djamars 9 yanüari 2024 alrededor di 18.51’or, Sentral di Polis a risibí informashon di un aksidente di tráfiko ku a tuma lugá riba Gosieweg na altura di e krusada ku Comanchestraat.
E patruya ku a yega na e sitio a topa ku un hòmber drumi abou ku multiple leshon na su kurpa.
For di investigashon preliminar ku polis a hasi na e sitio, a resultá ku e víktima tabata krusando tras di un pikòp ku tabata aserkando sin a tuma nota ku e pikòp tabata halando un treiler. E treiler aki a dal e víktima ku konsekuensia ku el a kai riba kaya.
Ambulans a transportá e víktima den situashon krítiko pa sala di emergensia di C.M.C. pa tratamentu médiko.
Mas lat a drenta informashon na Sentral di Polis, ku e víktima di e aksidente a fayesé. Ta trata di e hòmber Charles Christiaan Daal, nasé na Kòrsou dia 27 di yanüari 1961.