HOUSTON/CARACAS- E compania petrolero estatal Venezolano PDVSA ta tumando pasonan pa reemplasa al menos dos ehecutivo Mericano di e hunta di Directiva di su filial Citgo Petroleum Corp, cu base na Houston, segun fuentenan cercano na e decisionnan.
Citgo ta enfrentando desafionan sin precedente pa su finansas y adminstracion despues di cu e gobierno Mericano a impone sancionnan fuerte ariba PDVSA siman pasa. Esaki ta pa evita cu e dictador Nicolas Maduro ricibi ingresonan pa e benta di petroleo di e pais aki.
Merca y un decena di paisnan a nenga di reconoce Maduro ya cu ta considera su reeleccion di aña pasa, pa un segundo termino di seis aña, como uno fraudulento.
Presidente interino di Venezuela, Juan Guaido, cu a proclama su mes contra di e “usurpacion’ di Maduro den poder, ta creando cuentanan bancario cu yudansa di Merca pa por tin acceso na e ingresonan di exportacion, incluyendo e venta na Citgo, e principal activo di Venezuela den exterior.
E Hunta di Directiva di Citgo ta inclui al menos dos ciudadano Mericano, Art Klein y Rick Esser como tambe e Venezolanonan, Asdrúbal Chávez, Frank Gygax, Nepmar Escalona, Simon Suárez y Alejandro Escarra, segun un persona familiarisa cu e tema.
Citgo tin tambe un un directorio ehecutivo mas amplio, conforma ademas pa otro vicepresidente, un tesorero y un controlado ehecutivo, entre otro cargonan.
Asdrubal Chavez, Escalona y Escarra ta trahando for di un oficina na Bahamas, desde cu Merca a impone e sancionnan, fuentenan a revela.
Diabierna e minister di Asuntonan Petrolero y PDVSA, Manuel Quevedo a tene un reunion cu su vice minister y directornan. E agenda di esaki no a wordo revela.