Refineria di Korsou (RdK) a yega na un acuerdo cu PDVSA pa atende cu e debenan laga atras pa Refineria Isla BV despues di a para su operacionnan na 2019. E pagamento di e debe lo tuma luga mediante entrega di producto di petroleo na luga di pago cash.
Despues di e ceramento di e operacionnan di Refineria BV, e debenan a keda, tanto na Corsou como na Boneiro, caminda cu e compania di petroleo tabata administra e instalacionnan di BOPEC. Cierto producto di Refineria Isla BV a wordo bendi na Corsou pa cubri parti di e debenan cu a vence. RdK tambe a asumi parti di e salarionan paga n’e empleadonan.
Pero ainda ta keda pendiente di pago di un cantidad pendiente di mas di 100 miyon dollar, como tambe un debe den forma di salario n’e empleadonan y servicio brinda na Boneiro. E gobiernonan di Corsou y Hulanda a cuminsa cu negociacion pa ricibi pago di e debenan venci aki despues di e lantamento di e sancionnan di Merca contra Venezuela.
PDVSA a acorda awo pa paga e importacion restante den forma di producto di petroleo. E acuerdo aki ta parti di un cuadro mas amplio cu ta inclui futuro negociacion p’e reanudacion di e relacionnan entre Venezuela, Corsou y Boneiro. Na prome luga, ta trata di e uzo di e capacidadnan di almacenamento di Bullenbaai y BOPEC, pero tambe di e posibilidad di procesa crudo Venezolano na Corsou.
QATAR
Prensa internacional a informa na november cu Qatar a hunga un papel importante den e negociacionnan pa lanta e sancionnan di Merca di Venezuela. E decision di lanta e sancionnan a wordo tuma dia 17 di october 2023.
Poco despues, dia 22 di october 2023, RdK a anuncia cu nan a firma un MoU cu Onyx Petroleum Limited pa haya un socio adecua p’e maneho y e operacionnan di e refineria y di Bullenbaai. Onyx Petroleum Group ta un empresa priva estableci na Hong Kong, pero propiedad di Ghannim Bin Saad & Sons Group di Doha, capital di Qatar.
Maunsell Investment Management di Vancouver, Canada, ta coordina e due diligence di e instalacionnan di Refineria Isla y Bullenbaai. Ta spera di alcansa un acuerdo final cu Corsou na 2024. Maunsell, di su banda ,a firma un acuerdo cu e empresa local Alternative Energy Facility BV pa ricibi asistencia cu e debido diligencia.
ASFALT
American Global Oil Management Group ya ta renobando instalacion determina di e refineria pa produci asfalt p’e mercado Mericano. E intencion ta pa Global Oil cuminsa uza crudo Venezolano p’e produccion di asfalt na mei 2024, aunke tambe tin informacion contradictorio cu ainda tin poco actividad na Refineria Isla.
Onyx tambe tin planea pa inverti den un planta di gas LNG, pa permiti e refineria funciona cu menos contaminacion. E lantamento di e sancionnan Mericano lo mester permiti importa gas for di Venezuela.