Dia 30 di December, 2017 e aerolinea PAWA tabata tin un debe acumula cu tabata core den careda di 38 miyon dollar. Esaki ta encera vendornan local y stranhero. Ta trata di oficinanan na airportnan den exterior, hotel, companianna di seguro, companianan telefonico, companianan di electricidad y di taxi, te hasta un laboratorio clinico. Actualmente e suma aki por ta mas grandi.
E compania na februari ultimo a haci un apelacion di reestructuracion basa ariba e Ley 141-15 de Reestructuracion y Likidacion di Empresa y Personanan Fisico Comerciante.
Tin un denuncia contra di PAWA Dominicana y e presidente di su Conseho di Administración, Simeón Rafael García Rodríguez, caminda ta pidi pa un investigacion di abuso di confiansa y sospecho di labamento di placa, presenta pa e Instituto Dominicano de Aviación Civil (IDAC) y e Junta de Aviación Civil (JAC). Segun e dos entidadnan aki, e dosnan ariba menciona a haci uzo di recursonan pubico y a sconde esaki. Nan a transferi y administra of a uza e placa pa probecho personal.
Pa ley mester paga IDAC quincenalmente pa cu e tasa y derechonan di e actividad aeronautico colecta pa e operador aereo, pero, segun e denuncia entrega, desde maart 2017 PAWA no a paga mas te cu januari 2018 cu su Certificado di Autorisacion Economico a wordo suspendi. Tabata tin un acuerdo di pago cual PAWA no a cumpli cun’e tampoco.
Door di e suspension PAWA a afecta 18,724 pasahero cu a cumpra pasashi for di 20 di October 2017 te cu 25 di januari 2018. Hopi di nan a keda pega na airport y gobierno mester a zorg pa nan a yega nan destino.
Pa ora cu e aerolinea a wordo suspendi, a wordo informa cu na Venezuela a suspende e Certificado di Explotador di Servicio di Transporte Aereo di Santa Barbara Airlines, di cual García Rodríguez ta socio– pa no a cumpli cu e itinerario. Un otro suspension a keda emiti pa Aserca Airlines – cu tambe ta vincula na e empresario, pa cuestionnan di e poliza di seguro.
Avionnan di PAWA ta para na airport di Santo Domingo, cual uno so ta funcionando. E otro nan ta para pa falta di mantencion.