Den e ultimo dia di e caso contra Paul Croes pa investigacion IBiS e exminister di Gabinete Mike Eman II a admiti di a comete fout y a tuma mal decisionnan.
Anteriormente Procurador General durante su rekisitorio a bisa cu no mester tene ningun contemplacion cu Paul Croes. Esaki el a bisa pasobra pa PG a keda comproba cu el a saca placa for di un grupo vulnerable di personanan cu a bandona nan pais pa busca un miho porvenir na Aruba. Y hustamente e hendenan aki ta esnan cu a bira su victima. P’esey tambe el a pidi pa na momento cu Hof ratifica sentencia di prome instancia, duna un ordo di detencion mesora.
Tambe PG a pidi pa impone un castigo, ademas di prison, cu durante 9 aña e no por participa como candidato den eleccion. Paul Croes sinembargo a expresa cu e no ta interesa mas pa keda den politica, a pesar cu esey ta loke el a studia.
Na final di tratamento di su caso el a pidi pa tene consideracion cu tur loke su Abogado a trece dilanti y e hecho cu el a wordo trata di un forma inhumano durante e 80 dianan di su detencion.
E caso lo sigui dia 21 di September cu e ultimo parti di su casa, Melony Croes Paesch, cu ta e acusacion di labameto di placa. Y na final ta sera tratamento di e caso pa despues dicta sentencia den tres siman di tempo, of mas tempran.
