Dialuna merdia, despues di e tratamento di e caso IBIS, Sr. Paul Croes, a haci un declaracion na su salida for di edificio di corte.
Segun ex minister Croes, si ta pa Ministerio Publico, e mester haya cadena perpetuo den prizon. Asina e ta bisa den un comunicado dialuna atardi, como reaccion riba e formulacion di castigo tanto p’e como su casa den e caso Ibis. Ministerio Publico a pidi 5 aña di castigo di prison p’e y 10 aña for di politica, mientras cu pa su casa, 240 ora di trabou comunitario.
Sr. Croes, cu un tono bastante indigna Croes a cuminsa na bisa cu “Mi no a horta placa di pueblo, mi no a mata niun hende tampoco a abusa di mucha. Si ta pa e hendenan aki mi mester haya cadena perpetuo” tabata prome declaracion di Croes despues di a scucha exigencia di OM. Esaki ta den e forma cu Ministerio Publico a actua desde inicio. Nan a drenta cu cacho dos biaha riba mi yuinan 6or di mainta, a cerami manera un terorista den isolacion 80 dia, niun caso den Reino esaki no a sosode nunca. Esaki simplemente pa colga Paul Croes”. Segun Croes, e motibo cu e ta aki, ta pasobra e fiscalnan di Ministerio publico kier sigui haci malusa nan poder y a busk’e pa colga.
“ Si loke mi a haci, contrario na tur otro politico y partido, di lanta un stichting pa maneha donacion pa mi campaña politico transparentemente y nan kier hincami den prizon pa esey, anto ta tur nan lo mester bay husga. Esaki ta malicia y e intencion di e hendenan ki a cuminsa cun’e. Nan a acusami di abuso di poder, ami ta puntra mi mes, na unda mi derechonan como ciudadano a keda anto” Croes a sigui bisa den e comunicado. “Diaranson, mi abogadonan lo splica den detaye na e huez imparcial aki, con di berdad mi caso a cana, y mi kier keda reiteira cu mi no a haci locual mi ta wordo acusa dje”. Na final Paul Croes a mustra di kier mustra respet pa e hues y laga na final e decision den su man.