Un di e motibonan pakiko nos fraccion di MEP a pidi e reunion publico tocante Minister Paul Croes, tabata pa hasi un intento y convence tur otro Parlamentario cu mester tuma accion pa preserva e poco integridad gubernamental cu tin ainda, y na mes momento preserva e bon imagen di Aruba su Parlamento.
Nos no por permiti pa duna espacio na e minimo duda den e integridad di nos aparato gubernamental na Aruba. Como un pais nobo, chikito y desaroya, paisnan rond mundo tin nos na bista pa mira ki paso lo bay tuma awor pa mantene nos sistema democratico y politico limpi di tur tipo di acto di corupcion. Y ta door di esaki nos tin e obligacion moral pa tuma decisionnan responsabel pa cu Minister Paul Croes su caso penal.
Ta verdad cu ainda no tin un veredicto cu ta apunta Minister Paul Croes como culpable, pero e hecho cu e ta un sospechoso den un caso di corupcion y hasta labamento di placa, ta hasi cu moral y eticamente e lo mester a tuma su retiro voluntario caba.
Na Hulanda y den tur otro paisnan desaroya na mundo, etica ta dicta cu den casonan asina bo ta hala atras te ora cu e caso keda resolvi completamente. Y si resulta cu bo no ta culpabel, e ora bo lo por asumi bo cargo bek eventualmente. Esaki no ta solamente pa e investigacion por cana su curso corectamente, pero tambe pa no crea duda den e integridad di e cargo cu bo tin como mandatario.
Nos como representante di pueblo tin e deber y e obligacion pa mantene un imagen limpi y intachabel. Unabes cu nos perde esaki di bista nos ta perde e confiansa di pueblo, di nos coleganan den reino, pero tambe di tur cu ta wak con nos ta actua den casonan asina.
Ta pa es motibo cu nos di MEP ta keda para ariba cu Minister Paul Croes mester duna honor na su mes y tuma su retiro inmediatamente.