Clifford Rosa di Stichting Rancho a splica awe mainta cu a tuma nota cu ayera 3 di februari a cuminsa trabounan di lantamento di piedra na Waf’i Rancho, como tambe poniendo baricada. Den un entrevista e la vocifera su preocupacionnan pa cu e acceso di e piscadonan pa por yega mas cerca. “Ta di lamenta cu nos ta habri 2021 di e forma aki, caminda cu for di 2020 caba nos ta yega na cierto palabracionnan, y un di nan ta cu mester bin un ebeyecemento, e area semper mester di atencion, waste management etc pa e area completo,” segun sr. Rosa.
Ora ta papia di e area specifico aki, ta un punto cu ta duna Stichting Rancho dolor di cabes pasobra nan simplemente kier conserva parti di nos patrimonio Arubano, un parti di nos herencia, y ta lamenta cu trabaonan ta bolbe cuminsa sin cu a yega na mesa.
Aña pasa a entrega un carta na oficina di gobernador, cu contesta cu mester bay bek na e minister encarga. E minster encarga na e momento ey ta Prome Minister di cual tambe den proceso di november 2020 a manda carta p’e y te awe ainda no por haya un oido, un contesta of invitacion pa con lo trata esaki.
APA a manda un email tambe cu lo prepara un reunion, pero tambe esaki no a tuma lugar. E carta cu a wordo manda na gobernador cu caracter di urgencia tabata pa pidi pa para tur trabao na e area y sinta bek na mesa pa repasa tur locual cu por tin. DOW, DIP, APA ainda mester sinta na mesa, cu acuerdo y afspraak cu ta duidelijk. “E unico hecho cu ta wordo bisa akinan cu un openbare weg lo cambia pa bira un boardwalk, pa mi esey ta inacceptabel,” segun sr. Rosa.
Tin hopi pregunta ainda cu falta contesta riba locual ta miho pa comunidad,pasobra si comunidad mes no por yega pa cumpra pisca akinan mas, ta algo increibel sigur durante temporada di un pandemia.