Pastoral Hubenil Noord (PHN) ta un organisacion pastoral cu a wordo lanta mas of menos un aña pasa y ta cay bou di Parokia Santa Anna, situa na Noord. Un di e metanan ta pa guia e hobennan den nan tarea pastoral y pa yuda nan desaroya nan habilidadnan.
P’esey e grupo di PHN cu a atende e Hornada Mundial di Hubentud e aña aki na Portugal, yen di entusiasmo a scoge 15 di september ultimo pa tene un Presentacion di nan Biahe den Centro Apostolico Sta. Anna pa comparti nan experiencia, convivencia y conocemento cu e otro hobennan di PHN, y mayor- y catekistanan di PHN. E grupo a trata diferente aspecto di e biahe y a sa di contesta basta pregunta cu firmesa. Loke a resalta ta e hospitalidad y devocion di e casnan di famia caminda nan a keda na Meirinhas, culmina pa e encuentro cu Papa Francisco na Lisboa.
Na final di e actividad, tur presente por a disfruta di un dushi treat cu oportunidad pa socialisa.
Presente na e evento importante aki pa e hobennan tabata pastoor Santiago di Parokia Santa Anna y miembronan di directiva di Pastoral Hubenil Aruba, Reginald y Mirla Winklaar.
