Dialuna mainta a keda entrega un carta di manifiesto di parti un grupo di pastoor Cristian riba e amienda cu a keda entrega pa wordo trata den Codigo Civil door di Desiree de Souza-Croes. Pastoor Doodle Sofia a splica di e carta cu a wordo entrega na presidente di Parlamento, Marisol Lopez-Tromp.
Diadomingo, durante e manifestacion, cual tabata un caminata pacifico cu a wordo haci, ora cu a yega dilanti di porta di Parlamento, no tabata tin hende pa ricibi e manifiesto. Un cos ta, cu ora tabata tin e reunion di Parlamento dialuna ultimo, diamars a cuminsa mobilisa pa haya permiso pa haci e caminata aki. A tende di alto Comisario, cu el a firma e documento diaranson y a haya dos dia pa organisa, cual tabata diahuebs y diabierna. Sinembargo den e movimento, parce cu e informacion no a yega Parlamento. Pero asina mes, via telefon a papia cu varios Parlamentario, kendenan a duna garantia cu nan lo tey. A papia cu Melvin Tromp,kende a bisa cu Vice presidente di Parlamento, Chris Dammers lo bay tey.
E momento peculiar eynan tabata un desapunto, mirando cu toch nan a logra di pone 500 persona riba pia. A haya algun hende cu ta den contacto cu presidente di Parlamento mes, y a bisa pa bin su mañan, y pa asina nan por entrega e manifiesto.
Sofia a splica cu esnan cu a haci e caminata lo wordo haci den nomber di ciudadanonan preocupa. Sofia a bay na cabez, hunto cu un otro sacerdote. E manifiesto a encer’e den dos punto. Bao di ningun circunstancia ta kere cu e amienda ta algo bon pa e isla di Aruba. A bisa pakico tambe. A haci’e door di dos punto cual e prome ta cu loke ta kere cu e ta nifica pa cu Ley di Dios y automaticamente como un pais Cristian, cu ta kere den un Tata Todopoderoso y na di dos luga, loke ta kere cu e amienda por nifica pa sociedad, pa scol y pa nos yiunan. Den e manifiesto a splica bon cla cu ta kere cu e amienda ta bay facilita matrimonio di mesun sexo, locual cu den cierto caso e ta casi un matrimonio caba. Pasobra e persona cu registra, segun Geregistreerd Partnerschap, no ta improta si ta muhe y muhe of homber cu homber, ta haya tur derecho di matrimonio caba. Practicamente nan ta casa, pasobra nan a haya tur derecho. Ningun derecho nan a keda sin dje. Si dos nomber bay registra, ta berdad bin cu e argumento cu si nan a biba hunto hopi tempo caba y tin e particion di bienes puntonan balido. Pero tin cu tene cuenta cu ora nan bay registra, a duna nan tur e derecho di un matrimonio, cual ta nifica cu tur e consecuencianan. Ta pensa cu matrmionio ta ley di Dios, cu tin miles di aña ta tuma luga, entre un hende homber y un hende muhe. A bin ta vocifera cu no ta kere den esey, segun Sofia.
E parti caminda cu nan ta haya tur derecho di matrimonio a keda mesun cos. E cambionan cu a bin, no ta bay mishi cune. Awo esun cu bay registra como pareha, ta haya tur derecho mescos cu un matrimonio heterosexual.